Etnemarknaden
Folkeliv og barneglede på Etnemarknaden
Etnemarknaden 2024 er over, og dei tre dagane med yrande folkeliv har sett sine spor. No er hoppeslott, bodar og scenar i ferd med å bli rydda vekk.
Marknadssjef Vidar Lund er positiv til årets gjennomføring. Sjølv om han fortel at det var færre folk enn førre året, er han særleg nøgd med ein ting:
– I år har me satsa skikkeleg på unge, både med aktivitetsparken og dei ulike innslaga som har vore i Skakkeringen. Dette har aldri vore betre enn i år, og me har fått mykje god respons på det, fortel Lund.
Programmet har nemleg vore fullt av diverse innslag og aktivitetar for barn. I tillegg kunne ein ta i bruk leikestativa i Skakkeringen, samt den store aktivitetsparken som vart sett opp dagen før marknaden. Der kunne ein blant anna boltra seg i hoppeslott eller køyra bumperbil.
