Folkeliv og barneglede på Etnemarknaden

Marknadssjef Vidar Lund er positiv til årets gjennomføring. Sjølv om han fortel at det var færre folk enn førre året, er han særleg nøgd med ein ting:

– I år har me satsa skikkeleg på unge, både med aktivitetsparken og dei ulike innslaga som har vore i Skakkeringen. Dette har aldri vore betre enn i år, og me har fått mykje god respons på det, fortel Lund.

Programmet har nemleg vore fullt av diverse innslag og aktivitetar for barn. I tillegg kunne ein ta i bruk leikestativa i Skakkeringen, samt den store aktivitetsparken som vart sett opp dagen før marknaden. Der kunne ein blant anna boltra seg i hoppeslott eller køyra bumperbil.

Fleire av innslaga i dette området inkluderte kjende og kjære figurar frå barne-TV. Då Grannar snakka med ungane på området, var det særleg to namn som gjekk igjen: Bjørnis og Paw Patrol.

I etterkant av førestillinga til sistnemnde gjekk det an å møta og ta bilete med dei. Dette syntes treåringen Oliver Opheim var særs stas.

– Han elskar Paw Patrol, og har rista av glede heilt sidan dei kom inn på området, seier foreldra.

Fylde teltet under opningskonserten

Opningskonserten på fredag, saman med Inger Lise Hope, var ein stor suksess, fortel marknadssjefen. The Voice-vinnaren fylte teltet med over 400 stykker til stades.

– Publikum og artistar kosa seg masse, og det blei ein veldig lun og god stemning der, fortel Lund.

I tillegg til denne konserten var det kveldsarrangement på Saloonen begge dagane. På dagtid var det mykje forskjellig å sjå på marknadsområdet, både for dei små, men også for dei vaksne. Bodene bydde på alt frå heimelaga treverk, til målerier og klokker.

Ein av dei som sto inne i Skakkehallen var Junhild Synnevåg. Der stilte ho ut mjuke og fargerike figurar som ho hadde hekla sjølv. Ho tok turen frå Koparvik etter streng beskjed frå mora.

– Mor mi er frå Etne, og ho sa at eg var nødt til å koma til Etnemarknaden, fortel Synnevåg lattermildt, og legg til:

– Men eg er glad for å vera her. Det er eit skikkeleg flott opplegg, og så god stemning. Eg har til og med fått servert kaffi.

Første gong på marknaden

På området utanfor Skakkehallen var det også mange moglegheiter til å få i seg ein god matbit, anten frå nasjonale eller internasjonale trakter.

Under marknadens faste matkonsept Etnir Duggurd, fekk gjestane smaka på ein eksklusiv meny beståande av ferske råvarer. Menyen breidde seg frå ei krema blåskjellsuppe kokt på hardangersider til potetlompe med lammekjøt, reddikspirer og meir.

Ein som fekk prøva seg på matkonseptet for første gong var Ulf Mikkelsen frå Tromsø. Han kom med kjærasten og svigerforeldra frå Sandeid, som viste han både ein god gourmetlunsj og kva Etnemarknaden hadde å by på.

– Eg har ikkje vore her før, så det var kjekt å oppleva marknaden og denne gode maten, seier han.

Mykje folk tok turen, men ifølgje prosjektleiar Bernt Enge, var det litt færre enn i fjor. Likevel er han veldig nøgd med årets gjennomføring.

– Det har vore veldig kjekt, og me har fått mykje god respons på menyen. Det er sjølvsagt intenst når det står på, men alt i alt ein god oppleving, seier han.

Enge er utdanna kokk, og har sjølv vore med på matlaginga under prosjektet. I år tok han over stafettpinnen frå tidlegare prosjektleiar Line Njåstad.

– Det er mest å gjera på førehand av prosjektet, og det har vore spennande å vera leiar. Men eg har hatt god backup i Line, så eg har ringt ho eit par gonger, fortel han.

Ser fram mot neste år

For marknadssjef Vidar Lund har det vore ei kjekk, men også utfordrande helg.

– Det har vore mykje armar og bein i lang tid no. Matområdet flytta me til eit nytt område i år, og der har det vore litt problem med straumbehovet gjennom helga, men det er slikt ein må rekna med, fortel Lund.

Sjølv om marknaden nett stengde, har han heile helga tatt notatar til neste års gjennomføring.

– Det blir litt sånn at ein går og tenkjer på neste år allereie no. For eksempel med det nye området så ser ein fort kva som fungerar og ikkje fungerar, og kva me eventuelt burde endra på til neste år, avsluttar Lund.

Sjå fleire bilete frå marknaden HER!