Føler bygdene blir motarbeidde

— Dersom Statsforvaltaren og fylket er negative til alt som ikkje er i gangavstand til sentrum, blir det ei avvikling av Distrikts-Noreg. Det er utopi at me ikkje skal bruke bilen her, seier Stig Hatteland.

Nyleg var arealdelen av kommuneplanen til Vindafjord for 2025–2037 ute på høyring. Totalt kom det 73 motsegn frå offentlege instansar: 58 frå Statsforvaltaren i Rogaland, 14 frå fylkeskommunen og ei frå Vegvesenet.

Av desse handla 62 om areal som er lagt inn i planen. 21 av motsegnene gjaldt bustad, 19 næringsareal, sju kombinerte føremål, elleve naust og småbåthamn, og fire om turisme og turstiar.