Fleirtal for bompengar

I kveld er det eit stort folkemøte om E134 og vegen vidare for Bakka-Solheim i Etne. I den samanheng har Grannar spurt kvar av toppkandidatane til årets kommuneval om korleis dei og deira parti vil stille seg til kommunestyresak om innkrevjing av bompenger i sin kommune, for å få på plass heile eller delar av E134 Bakka-Solheim. Her er svara:

Vindafjord:

Ole Johan Vierdal (Sp)

— Det er ei statleg oppgåve å finanisiere ny veg Bakka-Solheim. Strekninga må prioriterast i Nasjonal transportplan (NTP) og det må setjast av pengar i statsbudsjettet. E134 er den mest trafikkerte ferdselsåra mellom aust og vest. I tillegg er den lokalveg i Etne og Vindafjord. Trafikken vil auke når Rogfast står ferdig og det vert fleire vogntog. Dersom ei delfinansiering med bompengar kan vere utløysande for prosjektet, må me vurdere det opp mot omsyn til lokalmiljøet, trafikktryggleik, ulykkesrisiko og næringslivet sine behov, seier han.

Guri Ravatn (SV)

E-134 Bakka – Solheim er først og fremst eit utbetring- og trafikksikringsprosjekt på ei naudsynt transportåre mellom aust- og vestland. SV meiner at utbygging av offentlege vegar skal betalast av offentlege pengar. Difor støttar SV trygging av ras- og ulukkesutsette strekningar og er motstandar av store utbyggingsprosjekt, som til dømes Hordfast. Kva Vindafjord SV vil stemma i ei eventuell kommunestyresak om bompengar, er avhengig av saksutgreiing, omfang, premissar og vegkostnad. I utgangspunktet vil SV stemma mot eit framlegg om bompengar.

Gustav Løge Fosse (KrF)

— Det beste er om staten finansierer alt utan bruk av bompenger. Vårt utgangspunkt er likevel at vi er positiv til bompenger om det må til for å få ein betre veg. Samtidig bør ein sjå på kor stor belastinga blir totalt for regionen. Når saka kjem opp må det sjølvsagt gjerast ei totalvurdering.

Modolf Haraldseid (H)

— Vindafjord Høgre er av den oppfatning at E- 134 mellom Bakka og Solheim har vore underprioritert av nasjonale politikarar alt for lenge. At dette skal rettast opp gjennom bompengar frå lokale bilistar synest ikkje å vera rett. Likevel er trafikktryggleik og miljø så viktig både for næringsliv og privatbilistar at Høgre vil gå for bompengefinansiering om dette er einaste utveg. Ei forutsetning er at dette vert i kombinasjon med nasjonale midlar, og at innkrevjinga ikkje slår urimeleg ut for lokale trafikanter.

Mats Årvik (Frp)

— E134 mellom Bakka-Solheim har stor nasjonal, regional og lokal verdi. Dette er ein Europaveg som er svært viktig både for næringslivet og private som staten må ta ansvar for. Det er ikkje aktuelt for Vindafjord FrP å støtte bompengar på denne vegen. Dessverre så kjem ikkje bompengar som eit tillegg til statlege milder, men ein erstattar for disse. Vi ser at kostnadene stadig aukar for vanlege folk, det kan vi ikkje bidra til. Her må staten ta sitt ansvar, og sikre ein forsvarleg Europaveg mellom Aust og Vest.

Anna Klette Steinsland (Vindafjordlista)

—Vindafjordlista meiner at prosjekt som går inn under NTP som hovedregel skal vera sentralt finansiert. Dessverre har ikkje det å koma på NTP si liste, vist seg som noko garanti for gjennomføring. Me har ikkje tid til å utsette dette prosjektet lengre. Om den einaste måten å få start på heile eller delar av E134 Bakka-Solheim er bompengefinansiering, vil Vindafjordlista dessverre måtte stemme ja til dette; for nærings- og buattraktivitet i Vindafjord.

Trond Christiansen, Norgesdemokratene

— Me meiner det er ei nasjonal oppgåve å koste ein slik veg. Me brukar 500 milliardar på bistand i året, som heller burde vore distribuert til prosjekt i Noreg, slik som dette. Men om det er bompengar som må til for å få Bakka-Solheim på plass, så vil me røyste for det.

Wenche Sandbakken Lilleland, Vindafjord Ap

— Ap er i prinsippet i mot bompenger. Men me ser på Bakka-Solheim som eit så viktig vegprosjekt at me kjem til å røyste for bompenger om det viser seg at det er det som må til for å få realisert prosjektet.

Etne

Mette Heidi Bergsvåg Ekrheim (Sp)

Kenneth Karlsen (Frp)

— E134 Bakka-Solheim er ein europaveg, og er såleis ei nasjonal oppgåve å både trygga og finansiera ei slik strekning. Det kan ikkje vera slik at det er Etne kommune sine innbyggjarar som skal betala prisen for å kjøra på ein europaveg. Me er likevel lydhøyre for kva våre innbyggjarar meiner om denne saka, så om det er parti som oppriktig meiner at innbyggjarane våre ønsker å betala bompengar skal me gjennomføra ei folkeavrøysting på dette spørsmålet, men det trur eg ikkje dei andre partia våger.

Johan Strømsvold (V)

— Etne Venstre støttar at Bakka-Solheim prosjektet må inn på NTP snarast mogleg. Etne Venstre har sagt ja til fortsatt å vera med i Haugalandspakken, og Bakka-Solheim må få høg prioritet der, siden dette gjeld heile Haugalandet. Effektiv vegtransport her sparer næringslivet for kostnadar. Etne Venstre vil ha større fokus på at utanlandske køyretøy verkelig betalar sin del av bompengane.

Andreas Grumheden (Ap)

— Så lenge premissa er som dei er for vegfinansiering, stiller me oss positive til delfinansiering ved hjelp av bompenger, for å sikre fremdrift i prosjektet. Bompengeandelen av finansieringa bør ikkje overskride 50 prosent, og takst må ligge på overkommelig nivå.

Arild Stenberg (H)

— Høgre i er imot bompengar, og arbeider for at bilistane skal sleppa denne ekstra utgifta. Me ser likevel at utan slik finansiering kan det gå svært lang tid før me får ny veg. Etter alt som har skjedd i vinter, kan me ikkje sitja og venta på at det skal komma pengar frå Oslo. Det vil vera uansvarleg og nesten umoralsk. Høgre vil difor seia ja til innkreving av bompengar for å få ny veg. Me vil òg vera med i diskusjonen om kor bommen skal stå.

Kurt Biger Hagen (INP)

— INP Etne vil ha oppgraderingar på E134 utan bompengar. Vi har betalt nok, ikkje minst dei som har mista nokon og sit att. Samstundes ser vi utbyggingar på austsida av fjellet, som blir bygd med skattepengar også frå oss på vestsida. Landet har ein samferdselsminister som fnyser av utsagn om at vegen er som ei geitesti», men det er den til Europaveg å vera.

Øyvind Kaldheim (KrF)

— Frå KrF si side tenker me at det trengst forbetring av veg Bakka-Solheim snarast mogleg. Prosjektet har hatt vekslande prioritering frå sentrale myndigheiter. Det er svært sannsynleg at KrF vil akseptere innkreving av bompengar for å få prosjektet i gang.

Vigdis Madssen (Raudt)

— Bompengar er ein flat avgift som ikkje tar hensyn til inntekta til dei som betalar. Raudt er derfor mot bruk av bompengar som finansieringskilde for vegbygging. Å finansiere naudsynte forbetringar for auka framkommelegheit, betre trafikksikkerheit, mindre utslepp og betre lokalmiljø må derfor vere ei offentleg oppgåve, finansiert av progressive skattar.