Finn fram til smaken på den gode honningen

— Det er mykje som spelar inn med tanke på å få god honning. Honning blir mellom anna laga av nektar frå lyngen. Lyngen er ei lunefull plante, som gjer at produksjonen kan variere frå år til år. Her på Bokn har lyngen betre forhold enn i Ølmedal, og difor har eg somme av bikubane her, seier Jan Hendrik Hansen.

Han har i tillegg bikubar i både Ølmedal og Vikedal. Når han plasserer ut nye bikubar, leiger han eigna areal hos ulike grunneigarar. Hobbyen starta for 20 år sidan medan han studerte.

— Eg har alltid vore glad i naturen. Når du driv med bier, har du ein finger på pulsen og alt som skjer. Det å drive med bier var dessutan ei fin avkobling frå lesinga i studietida, fortel Hansen til Grannar.