Næringsliv
Fekk viktig kontrakt
Prefabpartner får ei sentral rolle i bygginga av den nye legevakta i Stavanger. Selskapet med hovudkontor i Ølensvåg skal levere heile råbygget innanfor prefabrikkert betong og stål.
— Takk for tilliten, skriv Prefabpartner i eit Facebook-innlegg der dei annonserer kontrakten med totalentreprenør Consto AS.
Selskapet skriv at dei er svært stolte over å få bidra med si kompetanse i dette prosjektet.
Annonse
Stor investering
Bakgrunnen for prosjektet er at Stavanger kommune skal byggje ein ny legevakt og eit helsebygg på Ullandhaug. 13. mai skreiv kommunen under kontrakten med Consto AS, som deretter gjekk i gang med å prosjektere bygget.
På nettsida si skriv Stavanger kommune at i tillegg til ein større og betre tilrettelagt legevakt for tilsette og pasientar, samlar bygget fleire helseinstansar under same tak. Det skal etter planen stå ferdig våren 2028.
Formannskapet har vedteke bygging av ein fjerde etasje, og kommunen får dermed 18 nye plassar for korttidsopphald på sjukeheim, tett på legevakta, og andre fagmiljø i helsebygget og det nye sjukehuset. I januar skreiv Stavanger Aftenblad at prisen for bygget er 756 millionar kroner.
Annonse
Høg omsetnad på få år
Prefabpartner blei stifta sommaren 2022, og har hatt stor aktivitet sidan. I sitt første heile år, 2024, omsette dei for 39,89 millionar kroner.
Vidar Miljeteig er dagleg leiar. I desember 2024 var det totalt ti personar som arbeidde i bedrifta. Med seg på kontoret i Ølensvåg har Miljeteig montasjeleiar Runar Mosdal.
Ein viktig merkedag for bedrifta kom i desember 2023, då dei vann konkurransen om levering av råbygg til den nye brannstasjonen på Raglamyr, på kommunegrensa mellom Karmøy og Haugesund. Året etter signerte dei ein intensjonsavtale med Ølen IL om å byggje deira fotballhall i Ølen.
