Fekk tittelen Årets turist»
Anne Randi Askeland frå Skjold har vunne tittelen ein gong tidlegare, og i år gjorde ho det igjen. Ho var den i Skjold Turlag som fekk registrert flest turar, heile 301.
Turåret i Skjold går frå 1. juli til 31. juni, så dei over tre hundre turane er gjort i 2024 og 2025.
— Eg freistar å gå på tur etter at eg kjem frå jobb. Eg kan nå opptil tre registreringspunkt på same tur, fortel den barnehagetilsette sprekingen.
Annonse
Fleire mål
Den lengste turen ein kan registrera seg for er Storafjellsnibbå, men det er mogleg å nå den og Vardafjellet på same ettermiddag. Ein annan runde er Haukaberg, Ravnafjell og Holmavatn.
Det er eit system som no går ut kor ho noterer turane på eit skjema som ho leverer inn på ulike stader i bygda.
— Eg likte det systemet, og det er litt dumt at det er slutt. Det gav meg motivasjon, fordi eg fekk så god oversikt, seier Askeland, vel vitande at det nok kjem eit anna opplegg som etter kvart vil gi same motivasjon.
Annonse
Fleire år
Anne Randi Askeland har gått i fleire år. I tillegg til at ho òg har vore den som har gått flest turar for nokre år sidan, er ho alltid med på Skjold på tvers og Haugesund på langs.
Ho er opphavleg fra Tysvær, men flytta for ein del år sidan til Skjold. Når det gjeld turar, så held ho seg stort sett i Vindafjord kor ho i år har gått alle kommuneturane.
Spurt om kor mange hoggormar ho har truffe på sin veg på så menge kilometer i terrenget, så seier ho at det skjer.
— Eg er ikkje glad i orm, og det er ikkje minst om våren eg treff dei. Stort sett er det udramatisk, men tidlegare i år høyrde eg ein lyd rett bak meg, og eg ser då ein orm rett bak hælen min som freste mot meg med oppreist hovud, seier ho.
Ho finn både trening og rekreasjon i å gå tur, og ho trur det er sunnare for beina å gå på stiar enn asfalt.
Annonse
— Det er godt å koma seg ut på tur, ein får samla tankane og gå gjennom dagen, ikke minst frå jobben i småbarnsavdelinga i barnehagen i Skjold, seier ho.
På Facebook-sida si skriv iSkjold.no at dette var det siste året med registrering av turar på skjema.
— Turlaget vil likevel at alle turgåarar held fram med å skriva seg inn i turbøkene. Dette er for at me skal ha ei viss oversikt/ dokumentasjon over kor mykje turane blir brukte, skriv dei.
