Fekk stilla spørsmål til næringsministeren

Tysdag fekk Åkrafjordtunet besøk av næringsminister Iselin Nybø (V) som var invitert til Etne av Etne Venstre, med gruppeleiar Kristin Golf i spissen. Saman med dagleg leiar i Fikse Næringsutvikling, Nils Einar Steinstø, Jan Terje Rafdal (V), Lars Olav Bergsvåg og Lars Brandsås Øye, politisk rådgjevar besøkte dei tre bedrifter i Etne, og først på timeplanen stod Åkrafjordtunet.

I Åkrafjorden er det mange aktørar som går under same paraply innan turist- og reiselivsnæringa, og når alle står på ein så stor felles fot» er det også mange som blir hardt råka når ein pandemi slår innover land slik koronaen har gjort.

— I år skulle me hatt 15.000 gjester på besøk, og nå når me ikkje ein gong 1.000. Me skulle hatt ei omsetning på rundt seks millionar kroner, og i år når me ikkje éin million ein gong, seier dagleg leiar John Karsten Hustvedt.