Fekk prøva seg som arkeologar
Utstyrt med graveskei og bøtte fekk Elena Nordtveit (10) og resten av femteklassingane ved Ølen skule leita etter gamle skattar på utgravingsområdet aust for sentrum.
Utgravingsarbeidet på den kommunale tomta er i ferd med å gå mot slutten og nyleg inviterte arkeologane til open dag på utgravingsstaden. Her kunne alle som ønskte det stikka innom for å læra om det tidkrevjande og nøyaktige arbeidet som skal til for å jakta på spor etter fortida, og onsdag var det femte klasse ved Ølen skule sin tur til å prøva seg som arkeologar. Før det praktiske arbeidet kunne ta til fekk elevane ein lærerik gjennomgang av livet i jernalderen, kva funn som er gjort både på utgravingstaden og tidlegare funn i Vindafjord.
Museumspedagog ved arkeologisk museum, Universitetet i Stavanger, Ellen Bøe viste både slaggklumpar, keramikkbitar og tøyrestar frå utgravingar gjort i Vindafjord til dei interesserte elevane, og etter at den korte historietimen var over stod praktisk feltarbeid for tur.
Klassen blei delt inn i grupper med kvar sin arkeolog som læremeister og kvar gruppe fekk i oppdrag å undersøkje kvar si kokegrop for å finna spor etter fortida. Med stor iver jobba dei unge arkeologane seg nedover i jordlaget på jakt etter kolklumpar eller slaggbitar frå jernalderen eller tidlegare tider.
