Fekk helsa på nissen
Både nissefar og brannbamsen Bjørnis dukka opp under årets julegateopning i Etne sentrum.
I lett regn og mildvêr blei julegata opna i Etne torsdag ettermiddag. Den tradisjonelle julegrantenninga som vanlegvis finn stad i Tinghusparken gjekk denne gong føre seg ved Etne Bustadskiping. Gang rundt juletreet stod som vanleg på programmet og tradisjonen tru stilte musikantar ved Etne musikklag opp for å bidra med vakker julemusikk. Når den obligatoriske juletregangen var unnagjort venta ei hyggeleg overrasking til dei minste.
— Nå kan de få helsa på brannbamsen Bjørnis, opplyste ordførar Mette Heidi Bergsvåg Ekrheim til stor jubel fråd ei yngste.
Annonse
Fakkeltog
Bjørnis, som denne kvelden var litt dårleg til beins, måtte nøya seg med å vinka til barna frå verandaen ved bustadskipinga og då bamsen takka for seg var det tid for å setja kursen mot Skakke. Faklar blei tent og i samla flokk gjekk små og store i fakkeltog i retning storstova i bygda. Første stopp på vegen var Etne omsorgssenter, der musikklaget igjen serverte vakker julemusikk. Vel framme på Skakke blei bygdefolket helsa velkomen av sjølvaste nissefar som stod klar med sekken full av godsaker. Og når godsakene var vel fordelt var det mogleg å koma med eit julegåveønske eller to til nissen.
— Eg skal skriva ei ønskeliste til nissen, seier 7 år gamle Martine Heggen og set seg ned ved skrivebordet der ønskjelistene ligg klar for utfylling.
— Eg ønskjer meg dataspel og sminkesett, seier ho.
Annonse
Julegateopninga blei som vanleg avslutta med barnekino.
