Feira ny kjøkkenhage
Med grillmat, song, kaffikos og drøs kunne Liv Hansen (92) og dei andre bebuarane i omsorgsbustadane ved Vindafjordtunet endeleg markera opninga av den nye kjøkkenhagen.
I den nye hagen ved det kommunale omsorgssenteret i Vats er det pynta til fest. Fargerike flaggborder laga av brukarane på dagsenteret prydar buskar og tre, og på borda står norske flagg og vaiar i vinden. Bålpanna er i ferd med å bli varma opp og ventar på burgarane som snart skal serverast til gjestene. Og medan maten ligg og godgjer seg på grillrista dreg Ingrid Marie Dale fram trekkspel og fløyte og byr på lystige tonar til allsongen.
Den kombinerte sommarfesten og opningsfesten for kjøkkenhagen ved Vindafjordtunet kan byrja.
— Nå er det fest. Når ein har anledning må ein laga fest, seier 92 år gamle Liv Hansen og kosar seg i sommarvarmen saman med naboane i omsorgsbustadane og brukarane av dagsenteret ved Vindafjordtunet.
