Fann roa ved sjøkanten

— Velkommen til oss, smiler Erik Gravelseter og kona Toril.

Han er mest kjent for å ha bygd opp ei av bygdas mest suksessrike private verksemder, Etne Betong. Skipa i 1982 og definitivt eit av dei største næringseventyra Etne har sett. Noko kona også har ein stor del av æra for, som mangeårig medarbeidar – og omsorgsfull mamma for deira no tre vaksne barn.

Etter å ha via det meste av livet til verksemda, og som gründerar flest med langt færre veker ferie enn vanlege arbeidstakar kan nyte gjennom eit langt arbeidsliv, har ekteparet no flytta inn i huset kor dei etter kvart håpar å kunne nyte tilværet som pensjonistar – og besteforeldre – fullt ut.

Etne Sag

Den nokså herskapelege bustaden er sett opp i Sæbøvika, rett vest for Etne sentrum. På den same tomta som Etne Sag heldt til i gamle dagar, og kor Ole Martin Grindheim seinare bygda opp sitt livsverk, Etne Auto.

— Eg snakka tilfeldigvis med Ole Martin for nokre år sidan, og då han nemnde at han vurderte å selje den gamle verkstaden, då slo me til, fortel Erik.

Og etter kvart som naudsynt regulering kom på plass, så gjekk det fort når den gamle verkstaden var riven, og snekkarane kunne gå i gang. Spaden blei sett i jorda 12. juni 2020. Paret flytta inn til jul same året.

Medan mange i dag vel moderne funkishus, med store flater og flate tak når dei bygger nytt, har Erik og Toril valt ein litt meir tradisjonell stil. Eit trehus med saltak.

Oppdraget med å setje opp huset gjekk til Skånevik-verksemda Tungesvik Bygg, som også har teikna huset.

— Ein må handle lokalt når ein kan, slår Erik fast.

Dei viser veg inn frå entreen til ei eit stort rom som er kombinert hovudstove og kjøkken. Huset består i tillegg av ei tv-stove, tre soverom, vaskerom og ein stor garasje på 90 kvadrat. Ei stor utestove ligg også integrert i den vestlege enden. På veggene i stova heng det fleire flotte bilete som dottera og biletkunstnaren Reidun Synnøve har laga.

— Det er fint å ha noko som dottera i huset har skapt, slår dei fast.

Éin etasje

Erik er også nøgd med å ha alt på eit plan i det nye huset. Etter mange tunge fysiske løft gjennom arbeidslivet, måtte knea til 68-åringen under kniven nyleg.

— Eg hadde ikkje noko i mot trappene i det gamle huset. Men akkurat no er det greitt å sleppe å gå i trappar, medgir han.

Huset har ei romsleg grunnflate på rundt 360 kvadratmeter. Men då er det vel å merke inkludert eit stort hobbyrom», nemleg ein garasje på 90 kvadratmeter.

— Når det kjem til storleiken, er det ikkje så mykje større enn det mange andre har, legg dei til.

Å ha mogelegheit til å smette på seg tøflane og rusle inn i ein så romsleg garasje, synest Erik er kjekt. Der inne lagrar han mellom anna sin flotte Cadillac Eldorado frå 1971 og ein trehjuls mototsykkel av merket Rewaco frå 1997.

Nedanfor det flotte huset duvar ei stor flytebrygge. Naturleg nok. Det er jo ikkje få båtforeiningar i landet som har skaffa seg ein eller annan variant av den populære Etnebrygga – den største kommersielle suksessen til Etne Betong. For ein kar som Erik, som likar fiske godt, er det naturlegvis fint å spasere ut hagedøra og rett i båten.

— Sjå her, seier Erik, og viser fram eit bilde av korleis resultat av ein av dei siste turane på fjorden har blitt forvalta. Mange titals ferdigstekte fiskekaker.

Matlaging har vore ein kjær hobby for 68-åringen gjennom det meste av livet. At han har lagt ekstra kroner i solid marmor i benkeplater både innandørs og utandørs overraskar dei færraste.

Fontener

Mot sjøfronten er det bygd ein flott opparbeidd hage, kor to fontener set ein spiss på det heile.

Toril er blitt glad i sjøutsikta, men medgir at ho innimellom saknar utsikta frå deira tidlegare bustad, som sonen Tor Erik har overtatt.

— Ein ser jo utover heile bygda frå Gravelsæter. Men blir saknet etter den utsikta for stor, så reiser eg dit på besøk, smiler ho.

Dei har ei fint utsikt også i Sæbøvika. Frå eit litt lågare perspektiv enn på Gravelsæter, men med ei praktfull utsikt mot andre sida av fjorden, kor kjende Etne-nutar gir bygda le for den verste nordavinden. Stødlehetta i aust, Veten i midten og Børkjenesnuten i vest. Når Grannar er på besøk har tindane kledd seg i sesongens siste nysnø-genserar, medan dei speglar seg i ein blank Etnefjord.

— Joda, me har funne oss godt til rette her, slår Erik og Toril fast.