EU-støtte til lokal biogass

— Me ser på dette som ei viktig anerkjenning av kvaliteten og relevansen i prosjektet, fortel driftsleiar Rune Sørheim i Biovind i ein e-post.

No følgjer fleire samtalar og avklaringar mellom Biovind og innovasjonsfondet før ein endeleg støtteavtale kan signerast. Sørheim fortel at dette truleg vil skje på nyåret.

Viktig fond

Noreg er ikkje med i EU, men norske bedrifter kan likevel få støtte. Ifølgje Enova er EUs innovasjonsfond eitt av verdas største finansieringsprogram for utvikling og oppskalering av ny klimateknologi. Fondet støttar banebrytande prosjekt og gir norske aktørar moglegheit til å realisera innovative løysingar som kuttar utslepp og skapar framtidas arbeidsplassar. Enova skriv at gjennom støtte frå EU – finansiert via kvotesystemet ETS – kan norske industriverksemder løfta prosjekta sine frå idé til røyndom.

Fondet har eit totalbudsjett på 40 milliardar euro fram mot 2030, og støttar prosjekt som bidreg til store utsleppsreduksjonar og som tek oss mot eit klimanøytralt Europa innan 2050. Fondet er spesielt retta mot prosjekt med høg teknologisk og finansiell risiko, som elles ville hatt problem med å få privat finansiering.

Innovasjonsfondet passar ifølgje Enova for prosjekt som skal bidra til store utsleppsreduksjonar ved bruk av ny klimateknologi. Det er ope for både private og offentlege aktørar, og aktørar kan søkja anten åleine eller saman med partnarar.

Lokal forankring

EU presenterte nyleg ein oversikt over kven som får støtte i ein tabell på nettsida si. Biovind blir omtala som ei generell mellomstor verksemd innan energitunge industriar, i sektoren raffineri, som utviklar teknologi for produksjon av biometan og biogjødsel frå organisk avfall, og som no er invitert til å utarbeide tilskotsavtale.

— EU har vurdert prosjektet som innovativt, med ei effektiv førebehandling av substratet og ein sirkulær modell der både biogjødsel og biogen CO₂ blir ført tilbake til lokale aktørar. Dette gir både miljømessige og økonomiske gevinstar for regionen, forklarar Sørheim.

Biovind blei grunnlagt i 2018 og har hovudkontor i Sandeid. I 2024 kjøpte det spanske biogasselskapet Heygaz nesten 70 prosent av aksjene. Sørheim poengterer at Biovind framleis har eit breitt lokalt eigarskap, med over 60 bønder som medeigarar gjennom Biobonden, samt Fatland og Nortura som både eigarar og råstoffleverandørar.

— Prosjektet vil bidra til lokal verdiskaping, grøn industriutvikling og redusert klimagassutslepp – og aukar Vindafjord sin attraktivitet som grøn industrikommune, avsluttar driftsleiaren.