Etnemarknaden
Etnir Duggurd sette ny rekord
Kortreiste råvarer dandert av lokale og profilerte kokkar blei ein slager i år igjen. Etnemarknaden sitt populære matarrangemen Etnir Duggurd sette ny rekord.
For sjette år på rad blei matkonseptet Etnir Duggurd gjennomført på Etnemarknaden. Med TV-profilane Frode Aga og Lise Finckenhagen i spissen for matlaginga, og Heine Totland bak mikrofonen, vart det omsetningsrekord i år.
— Det var veldig stas å sjå at så mange kom, og at det var så god stemning i teltet. I år blei det til og med omsetningsrekord, så me er veldig fornøgde med det, seier prosjektleiar Line Njåstad.
Annonse
2500 porsjonar servert
Årets meny besto av sju ulike rettar som ein kunne velja i mellom, alle laga av lokale råvarer. Blant rettane kunne ein finna storfe frå Etne, og einebærgrava fjellaure frå Tyssedal.
Mange timar før teltet opna for besøkande, sto Frode Aga, Finckenhagen og fleire lokale kokkar og hobbymatlagarar klare til å byrja med tilberedinga. Å laga 2500 porsjonar med mat tar tid og krev mange hender.
Ein av dei som ikkje hadde kokkebakgrunn, men som trivst godt med å laga mat, er Frode Robberstad. Han jobbar til vanleg i Autostore, men seier ikkje nei når han blir spurt om å vera med å laga mat til over 500 menneske på marknaden.
Annonse
— Det er veldig kjekt å få moglegheita til å vera med på noko slikt som det her. Eg får jobba med så flinke kokkar, også likar eg jo godt å laga mat, fortel han.
God stemning med Heine
Samtidig som ein kunne forsyna seg med gourmet-rettar, sto Heine Totland på scenen og snakka og song. Dette vart godt motteke av samtlege i publikum.
— Me har vore her før, og synest det alltid er så god mat. I tillegg er det jo ekstra kjekt når Heine er på scenen, sidan han er så flink til å opptre, fortel Sigve Steinstø fra Etne.
Flinke frivillige
Bak det populære matkonseptet er det mykje frivillig arbeid som skal til. På alle bordene er det pynta fint med dukar og blomar, og i løpet av arrangementet er det folk som serverar og ryddar, i tillegg til å bemanna baren. Dette er det Ul Fram som har stått for kvart år.
Annonse
Ein av dei som er med i styret er Kristin Hageland frå Bergen. Ho har vore med i mange år, og trivest godt med å driva dugnad for revygruppa.
— I forkant av marknaden har me skaffa dugnadsfolk, og organisert kven som skal vera her i dag. I tillegg til å plukka blomster og pynta bordene her inne i teltet. Det er jo litt ekstra nå når det er Duggurd, siden det skal vere gourmet-preg over det, fortel Hageland smilande.
Prosjektleiar Line Njåstad er storfornøgd med innsatsen til alle som har trødd til både i forkant, under og etter årets Etnir Duggurd.
—Dette hadde ikkje gått utan dei flinke kokkane, og dei mange frivillige som har vore med å hjelpt til, seier ho.
