Etnebu sluttar i Kvelertak
Bjarte Lund Rolland og Erlend Hjelvik, opphavleg frå Etne og Vikedal, var to femtedelar av grunnstamma i metal-bandet som blei starta i Stavanger 2007. Hjelvik slutta i 2018, og no sluttar Rolland.
Den 41 år gamle gitaristen og låtskrivaren, opphavleg frå Etne, er dermed ikkje med på turneen som starta i Kongsberg siste dagen i oktober. Kvelertak skal spela i byar som Berlin, London og Paris, og sluttar av i München 28. februar neste år.
Metal-bandet har i Rolland sine år gitt ut fem album, og har har turnert omfattande. I samband med at han no sluttar, skriv bandet at talentet hans, riff, låtar og scenepersonlegdom har vore ein sentral del av å setja Kvelertak på verdskartet.
Annonse
Nokre av dei mange høgdepunkta for Rolland er at allereie to år etter oppstarten, spelte bandet mellom anna på Roskildefestivalen og Øyafestivalen. I åra 2011-2013 turnerte Kvelertak rundt i Europa og USA. I 2014 var dei oppvarmingsband på ein stor Metallica-turnè, og det same gjorde dei på den europeiske delen av Metallica sine turnèar i 2017 og 2018.
I samband med informasjonen av at Rolland sluttar, skriv bandet at turneen blir den siste for bandet på ubestemt tid.
Heilt utan kopling til Etne og Vindafjord er likevel ikkje bandet. Gitarist Vidar Landa, som òg er ein del av grunnstamma frå 2007 i bandet, er frå Stavanger med etternamn som kan koma frå Øvre Vats. Knytinga til Etne er langt sterkare fordi han er livsledsager med den alltid høgt kritikarroste artisten Anne Lise Frøkedal, opphavleg frå Etne.
