Kommunalsjef for helse, Hilde Selland Winterthun.
Foto: Grethe Hopland Ravn
Endrar rutinane for heimetenester
Formannskapet i Etne fekk tysdag ei orientering frå kommunalsjef for helse, Hilde Selland Winterthun, om den pågåande omorganiseringa av heimetenestene. Målet er å sikra eit meir effektivt og framtidsretta tenestetilbod.
Den pågåande omorganiseringa, som bygger på politiske vedtak frå 2023, skal sikra eit meir samordna og effektivt tilbod for brukarane av heimetenestene i Etne kommune, men konsekvensane for omorganiseringa møter uro. Kommunalsjef Hilde Selland Winterthun møtte politikarane i formannskapet og understreka i møtet at endringane ikkje vil føra til kutt i stillingar, men at fleire vil få nye oppmøteplassar i løpet av dei neste fire månadene.
— Brukarane våre vil ikkje oppleva endringar i tenestetilbodet. Det er det viktigaste, og målet vårt er å sikra eit betre tilbod enn før, sa Winterthun.
Ho la til at dei vil samla ressursar og sikra at kommunen kan tilby eit likt og stabilt tilbod til brukarane i kommunen i framtida. Eit sentralt grep i omorganiseringa er å samla medisinlageret i Etne. Winterthun peikte på at dette vil gi betre nødvendig kontroll for å redusera svinn. Når det gjeld tryggingsalarmar, vil desse framleis bli administrerte via eit ressurssenter i Kristiansand, som raskt kan vidareformidla hjelp til bebuarane.
