Elevane får prøvd seg i arbeidslivet

Niandeklasseelevane i arbeidslivsfag på Vikedal skule sit og reknar på kva dei har tent så langt på elevbedrifta som dei har hatt i vårsemesteret. Etter at dei har summert opp, kom dei fram til at dei har tent 10.000 kroner. No må dei bestemma seg for om kvar elev skal få utbetalt, eller om dei skal investera pengane i eigenkapitalen som dei treng til vidare prosjekt. Dei diskuterer seg imellom korleis dei vil løysa det. Elevane er engasjerte, og det blir gode diskusjonar. Fram til no har dei vore samla som ei elevbedrift, der alle pengane går i same kasse. Men til våren skal dei dela seg inn i mindre grupper med eigne idear, så dei som vil satsa ekstra kan få moglegheita til det.

— Det blir spennande å sjå kva det blir ut av dette utover våren. Det er kjekt når dei finn noko dei verkeleg likar å halda på med, seier lærar Sander Eike.

Arbeidslivsfag er eit praktisk retta valfag på ungdomsskulen som gir elevane erfaring med reelle arbeidssituasjonar. Faget er eit alternativ til spansk eller engelsk fordjuping.