Tobias Aarekol (f.v., Helgevold), Vera Gjerde (Vindafjord kommune), Inger Constanse Eidhammer Lunde (Vindafjord kommune) og Ingeborg Owe (Haugaland Kraft) har hatt sommarjobb gjennom Sildikon Valley-prosjektet. Her frå avslutninga av programmet i Haugesund fredag.
FOTO: PRIVAT
Ekstra spennande sommarjobbar
Fire frå Etne og Vindafjord har vore med i sommarprogram og internship for studentar i Sildikon Valley. Ølensbuen Tobias Aarekol (21) har kost seg gjennom seks lærerike veker hos Helgevold i Sandeid.
— Det har vore veldig kjekt. Me har fått ei litt open oppgåve, så me har kunna jobba med det me synest er mest interessant, fortel Tobias Aarekol.
Saman med Tone Kringeland frå Grinde har han utforska smart energistyring for næringsbygg og industrikundar på Haugalandet, med hovudfokus på solceller og batterilagring i løpet av seks veker hos Helgevold. Målet har vore å finna ut korleis fornybar energi kan utnyttast meir effektivt, redusera straumforbruket og bidra til grønare energiløysingar for framtida.
Sildikon Valley-programmet blir gjennomført i regi av Haugaland Vekst. Det samlar studentar frå heile Noreg for å jobba med oppgåver gitt av bedrifter på Haugalandet. Forutan Aarekol har Grannar-distriktet vore representert med Ingeborg Owe (23) frå Vikebygd i Haugaland Kraft, og vikedalsbuen Vera Gjerde (20) og etnebuen Inger Constanse Eidhammer Lunde (23) i Vindafjord kommune. I tillegg har AutoStore hatt seks studentar på sitt hovudkontor i Vats.
