Ein liten oppsving for årets julehandel

Handelsorganisasjonen Virke spådde at julehandelen i november og desember 2025 ville bli rekordstor med ein samla handel på rundt 150 milliardar kroner. Det er ei auke på 5,5 prosent frå same tid i 2024 og tilsvarar eit gjennomsnittleg beløp per person på 26.700 kroner. Ved dei tre kjøpesentera i Etne og Vindafjord har fjorårets julehandel i desember månad gått omlag som i 2024, men med ein svak auke for dei fleste butikkane. Interiørbutikken Princess på Etne senter er blant butikkane som har opplevd ein liten auke.

— Me er godt nøgd med julehandelen og me hadde ein liten auke frå året før. Folk har vore flinke til å handla, noko me er veldig takksam for, seier dagleg leiar av Princess, Anna Helen Strand Eikeland og er godt nøgd med desembertala sjølv om omsetnaden ikkje viser den store auken.

— Me ønskjer å stadig forbetra oss og vera eit attrativt tilbod til kundane våre, seier ho.