Ei minneverdig helg langs veglause gardar ved Åkrafjorden

Helga 29.–31. august deltok eg på turen Langs veglause og fråflytta gardar på nordsida av Åkrafjorden». Ferda gjekk den opphavlege ferdselsåra mellom dei nedlagde gardane langs fjorden. Alle deltakarane gav uttrykk for at dette var ei flott, humørfylt og krevjande oppleving.

Me møttest fredags kveld på Åkra oppvekstsenter, og hadde eit hyggeleg middagsmåltid saman. Deretter fekk me ei interessant rundvising i Åkra kyrkje, der ein engasjert lokalhistorikar fortalde.

Natta vart tilbrakt i sovepose på golvet i gymsalen. Laurdag morgon vart me frakta i ein skøyte inn til Kvandal, der me vart sett i land. Overfarten var ei fin oppleving.

Turen gjekk frå Kvandal, via Strand, Bjelland, Eintveit, Djuve og Tøsseteigen, før me overnatta i eit fint restaurert bøkkerverkstad ved sjøen nedanfor Eikemo.

Dei fleste husa me passerte var velhaldne. Då me kom til Djuve vart me traktert med vaflar, deilig kake og kaffi av eigarane der.

Det var tankevekkjande å sjå den stien som så mange barn måtte gå for å komma til skulen. Det var ein sti som opphavleg var mura opp fleire stader. Men denne har sidan rasa delvis ut, og der var ein del rotvelt. Store delar av stien var grodd att – slik at turleiarane måtte rydde sti i bjørnebærkratt og kjerr. Om ikkje stien blir vedlikehalden framover, vil han på sikt forsvinna.

Sundag gjekk me opp til Eikemo og vidare innover til Glåmo. Dette er eit flott dalføre.

Etterpå vart me henta og frakta tilbake til Åkra av same båt som laurdag.

Ei deilig helg rik på opplevingar og fellesskap.

Tusen takk til dei dyktige turleiarane Gunnlau og Anne Kari, som gjorde turen til ei humørfylt og fin oppleving!

Knut A. Omdal