Ei fjør i hatten for Aadland

Det var godt i overkant av fem tusen personar som søkte kunstnarstipend i år, og det var litt over tusen av dei som fekk positivt svar frå Kulturdirektoratet gjennom Statens kunstnarstipend. Det er eit komponiststipend den utflytta vikebygdingen har fått tildelt.

— Det heng høgt for meg dette, for eg veit at det kun var tjue stipend som vart delt ut til populærmusikk, seier Tom Roger Aadland.

Aadland seier at det han har fått er eit arbeidsstipend kor det ligg implisitt at ein skal skapa nytt materiale. Ettersom han fekk liknande stipend i det han meiner var i 2013, og for rundt fem år sidan, er han kjend med krava som slike stipend fører med seg.

— Me som lever av variable inntekter, er glade for at slike stipend blir betalt ut månadleg i det året det gjeld. Sjølv om det i pengar ikkje tilsvarar ei vanleg årsløn, gir det ein solid økonomisk fot på kontoen kvar månad slik at ein bekymrar seg mindre i månader der ein er lite ute på vegen, seier han.

For andre

Han fortel at med stipendet kan han i større grad bruka tid til å skriva for andre artistar. Slikt arbeid gir ikkje særleg kortsiktig økonomisk effekt, men at inntektene kjem som honorar gjennom TONO-systemet til komponistar, tekstforfattarar og låtskrivarar. Aadland legg ikkje skjul på at han har monalege inntekter frå det han har skrive for andre.

— Eg er glad i å skriva for andre, og eg føler at eg har noko å bidra med som tekstforfattar. Stipendet gjer at eg no kan gjera dette med godt økonomisk samvit, ikke minst etter at mitt eige program i haust er ferdig, seier Aadland.

Han seier at speleprogrammet er fastsett mange månader fram i tid, men som resultat av stipendet blir det totalt sett noko færre opptredenar i år.

— Det er nyttig for meg å vita at eg kan setja av tid i eit par månader til utelukkande å skriva. Det gjer at eg kan konsentrera meg utan forstyrrande element, seier han.

Det er godt kjent at Aadland har ein spesielt forhold til Bob Dylan sin musikk. Han har ikkje minst oversett mykje av Dylan til nynorsk, og han har gjeve ut to album med Dylan-gjendiktingar.

— Eg kan trekkja inn Dylan i dette òg. Han har nemleg uttalt at balanseringa mellom skriving og opptredenar kan gjera ein musikar gal, seier Aadland.

Det er ikkje lenge til han skal opptre på heimlege trakter. Den siste fredagen i april er han i Vikebygd kyrkje saman med sin gamle elev frå musikklinja på Skeisvang vidaregåande skule, haugesundaren Kjetil Steensnæs, som spelar fast med Bjørn Eidsvåg. Steensnæs og Aadland, som begge held til sentralt på Austlandet, har gjort mykje i lag og for kvarandre.