— Eg set stor pris på at eg kan levera barna på skulen og kjenna at eg er ein del av eit fellesskap

— Eg elskar hageprosjekt om våren! Det å skapa små soner med plattingar, trapper og grøne krokar gjev meg både ro og meistringskjensle. Eg ser det for meg i hovudet, og så får eg det til i røynda – det er magisk. Eg er òg veldig glad i interiør og brukar mykje tid på å style og innreia bustadane me eig for utleige og Airbnb.

— Kor reiser du helst på ferie?
— Eg trivst veldig godt i norsk sommar – så lenge det er sol og lite vind! Men eg kunne gjerne hatt sommar i ni av tolv månader i året. Når behovet for sol og varme blir stort, drøymer eg meg ofte bort til Thailand eller Nord-Italia. Italia har ein heilt spesiell plass i hjartet mitt.

— Kva er det beste med bygda du bur i?
— Den rolege stemninga og nærleiken mellom folk. Eg set stor pris på at eg kan henta og levera barna på skulen og kjenna at eg er ein del av eit fellesskap der mange kjenner kvarandre og bryr seg. Det skaper tryggleik, og det gjer bygda vår spesiell.

— Kva saknar du i bygda di?
— Eg skulle ynskja det var endå meir rom for å heia på kvarandre og dela det me får til – både stort og smått. Det er så inspirerande når me tør å visa fram draumar og mål, og eg trur bygda vår har endå meir å vinna på ein kultur der me lyfter kvarandre fram. Det å vera raus med heiarop og støtte gjev så mykje energi – og det smittar!

— Kva er ditt favorittmåltid?
— Frukost med cottage cheese, friske bær (jordbær, blåbær og banan), hakka mandlar, chiafrø – og ein liten dasj sjokonøtt. Ein perfekt start på dagen!

— Kva gler og kva irriterer deg mest?
— Eg blir oppriktig glad når eg møter menneske som unnar andre å lukkast og tør å snakka høgt om draumar og mål. Det inspirerer meg og gjev meg motivasjon. Det eg synest er utfordrande, er når me blir redde for ulikskap eller prøver å pressa alle inn i same form. Me er ulike – og det er nettopp det som gjer fellesskapet vårt rikt og levande.

— Dersom du hadde politisk makt, kva ville du ha kjempa for?
— Eg ville arbeidd for at gründerar får meir støtte og moglegheit til å veksa. Dei skaper enorm verdi – ikkje berre økonomisk, men òg kulturelt og sosialt. Me treng system som heiar på initiativ, kreativitet og mot til å tenkja nytt.

— Kva gjer du når du skal unna deg noko ekstra?
— Då prioriterer eg eigentid. Ei god treningsøkt, ein lang dusj og ein kveld på sofaen utan ansvar – berre kos. Og viss eg verkeleg skal drøyma meg bort, ser eg for meg ein solotur til utlandet – med sol, stillheit og noko godt i glaset.

— Kva er ditt beste barndomsminne?
— Lange sommardagar utan planar. Å springa barbeint ute og kjenna at heile dagen var open – den fridomskjensla lever framleis inni meg.

— Kven ser du mest opp til?
— Eg blir inspirert av menneske som går etter draumane sine og ikkje gjev opp, sjølv når vegen er krevjande. Dei som vel ansvar framfor offerrolle, og som skaper sitt eige liv. Erik Bertrand Larsen har hatt mykje å seia for meg – eg har lese alle bøkene hans, og han minner meg på kor mykje kraft som bur i tankesettet vårt. Bertrand skriv om mykje mental styrke alle kunne hatt godt av.