Sparebankstiftinga gjer i dette debattinnlegget greie for gåva dei ønskjer å gi til Skakke.
ARKIVFOTO: RENATE SÆVAREID
Dialogen rundt Skakke held fram
Ei eventuell omdanning av Skakke SA innan utgangen av året, er framleis ein pågåande sak. Gåvepakken frå Sparebankstiftelsen krev ein betydeleg reduksjon i kommunen sin eigardel. Fleire detaljar skal avklarast i eit eigarmøte seinare i september.
Skakke SA står framfor omfattande endringar, og dialogen mellom Sparebankstiftinga, kommunen og styret i Skakke held fram. Kommunedirektør Filippo Ballarin informerte Etne kommunestyre tysdag at prosessen som har vore i gang både før og etter sommaren, har hovudsakleg handla om innhenting av informasjon og avklaringar knytt til selskapet sin framtidige struktur.
Innan nyttår
Det siste nye i saka er at Sparebankstiftinga planlegg å overrekke pengegåva til Skakke SA innan 31. desember 2024, under føresetnad av at eit lån på 4 millionar kroner blir ettergjeve av kommunen. Som ein del av denne prosessen skal selskapet omdannast frå eit samvirkeføretak (SA) til eit aksjeselskap (AS). Sparebankstiftinga har tidlegare signalisert at kommunen bør redusera eigardelen sin i selskapet betydeleg, og no kan det sjå ut til at kommunen sin eigardel vil bli redusert til under 10 prosent. Det inneber at aksjar kan bli overførte til både stiftinga og ein tredjepart, som framleis ikkje er endeleg avklart.
