Monica Nesheim (Sp) er den mest populære politikaren i Vindafjord om ein tek utgangspunkt i talet på personstemmer.

Foto: Svein-Erik Larsen

Kommuneval 2023

Dette er det nye kommunestyret

Tysdag kveld blei det nye kommunestyret i Vindafjord klart. 39 år gamle Monica Nesheim (Sp) frå Vats var den som fekk flest personstemmer og kom inn i kommunestyret for første gong.

Svein-Erik Larsen Svein-Erik Larsen

Publisert 12.09.2023 - 22:27 Sist oppdatert 13.09.2023 - 13:56

— Eg blir litt tom for ord, seier Monica Nesheim (Sp).

Vatsbuen fekk 293 personstemmer og 87 slengarar.

Annonse

Opptatt av heilskapen

Nesheim trur det blir interessant og kjekt å sitte litt tettare på det som rører seg når ho trer inn i kommunestyret. Erfaring frå Vats grendautval, FAU og som kommunalt tilsett i Karmøy, Haugesund og Etne trur ho blir nyttig å ta med seg inn i sitt nye verv. Per nå har ho ikkje ein enkelt hjartesak, men heller eit heilskapleg fokus.

— Eg vil at me alle skal kjenne på at me kjem frå ein kommune, seier Nesheim.

Trass at ho er opptatt av at Vindafjord skal stå saman som ein felles kommune, er ho kanskje mest kjent for sitt engasjement for Vats i blant anna gruppa Vats i vekst. På dagen det blei kjent at kommunedirektør Yngve Folven Bergesen foreslår å bygge sklie som ein del av den planlagde symjehallen i Vats tek ho seg tid til ein kjapp reaksjon om heimbygda sitt kommande signalbygg.

Annonse

— Sklia må vere på plass for at folk skal komme til bassenget, så det var gledeleg å sjå at det var med i forslag, seier vatsbuen.

Les også:

Kommunedirektøren går inn for sklie

— Ikkje berre valflesk

Ein annan som blir ny i det kommande kommunestyret er Bjørn Alvseike (Frp). Kort tid etter at han fekk nyheita var han veldig fornøgd.

— Eg må jo berre sei at eg set pris på alle som har stemt, både på Frp og dei som har gitt personstemmer. Nå er det opp til oss å vise at me står for det me har sagt i valkampen og at det ikkje berre har vore valflesk, seier Alvseike.

Ølensbuen fekk 118 personstemmer og 56 slengarar. Med det snappa han opp Frp sin tredje og siste plass i kommunestyret bak kumulerte Mats Årvik og Gerd Kvamme.

Bjørn Alvseike har markert seg som blant anna leiar for symjegruppa og aktivitetsdagane i Ølen IL. Nå skal han sitte i kommunestyre.

Å sitte i kommunestyret er ikkje noko nytt for Anna Klette Steinsland. Etter å ha sitte for Bjoa Bygdeliste er ho nå klar for å vere blant Vindafjordlista sine representantar. Ho var den kandidaten som fekk flest slengar med heile 142.

Annonse

— Det er det som er å vere folkevalt, seier Klette Steinsland.

Ho fekk også 248 personstemmer. Totalt 25 representantar blei valt inn i kommunestyret i Vindafjord. Ni av desse er kvinner og 16 er menn. 24 år gamle Håvard Rørtveit (H) er yngst i det nye kommunestyret, mens 69-åringen Åge Opheim (H) er eldst.