Demonstrerte mot havvindplanar

— Eg har ikkje demonstrert før, så det var litt spesielt, men det var eit godt høve til å vise at dette ikkje er noko me vil ha i bygda, seier styreleiar Jon Magne Svendsbøe i Bevar Ålfjordens Perle.

Han siktar til Vindafjord kommune og Westcon sine planar om å utvikle Dommersnes Industriområde i Vikebygd til serieproduksjon for havvindnæringa gjennom selskapet Dommersnes AS/Windafjord Port. Bevar Ålfjordens Perle er ein organisasjon som vaks ut av ein underskriftskampanje mot desse planane.

— Ikkje berre fryd og gammen

Floating Wind Days startar offisielt onsdag, men allereie tysdag blei det arrangert ein busstur som i tillegg til Dommersnes gjekk innom Westcon sitt verft i Ølensvåg og AF Decom Miljøbase i Vats. Organisasjonen Motvind Tysvær nytta sjansen til stå for ei tydeleg markering mot havvindplanar på blant anna Dommersnes. Bevar Ålfjordens Perle blei med og stilte med Svendsbøe, May Britt Vikingstad og Tony Cheek, samt banneret Ikkje øydelegg bygda vår – Bevar Ålfjordens Perle!».

Dei omlag ti demonstrantane fekk ifølgje Svendsbøe stoppa bussen i cirka eit minutt ved Svendsbø bru. Etter det følgde dei bak bussen ned til kaien industriområdet på Dommersnes, kor det var ei omvising. Svendsbøe fortel at det var mange internasjonale gjestar på bussen og at demonstrantane følgeleg ikkje snakka så mykje med desse, men at dei fekk fram poenget sitt.

— Me ville markere at det ikkje berre er fryd og gammen å bygge ut, seier Svendsbøe.

Han fortel at det kan hende at dei vil ha fleire aksjonar framover, men at ingenting konkret er planlagt førebels. Nå ventar Bevar Ålfjordens Perle på Statsforvaltaren i Rogaland sin respons på at Utval for drift, utvikling og kultur (DUK) vedtok å oppretthalde Windafjord Port sitt byggeløyve til fase 1. Denne delen av utbygginga omhandla utsprenging av eit samla område på 54 dekar innanfor det tidlegare nytta området på Dommersnes.

Fase 1 er første steg i planane om utvikling av industriområdet på Dommersnes til potensiell serieproduksjon til havvindnæringa. Fase 2 legg opp til å ta enda meir areal i bruk, mens fase 3 vil krevje alle dei over 500 måla som regulerte til industri og at Vikevegen blir lagt om. For fase 2 og 3 er det starta ein prosess med ny reguleringsplan.

Vil bli verdsleiande

Opplevinga av kor kontroversielt spørsmålet om havvindutbygging er i Vikebygd blei oppvarming til den internasjonale Floating Wind Days konferansen for busspassasjerane. Gjennom onsdag og torsdag skal ei rekke profilerte personar gå på scena i Maritim Hall i Haugesund for å diskutere store geopolitiske spørsmål, forsking, industri og meir. Blant desse er statssekretær Astrid Bergmål (Ap) i Olje- og energidepartementet, konsernsjef Camilla Stoltenberg i NORCE Norwegian Research Centre og prosjektdirektør Siri Espedal Kindem i Equinor.

Arrangøren Norwegian Offshore Wind er ifølgje eigen nettside det største industrinettverket i Noreg med nesten 400 medlemmer som varierer frå nystarta bedrifter til store havvindutviklarar. Målet deira er etablere verdsleiande forsyningskjedar med flytande havvind. Nettverket har adresse i Haugesund.