Bygdene vil ha bedrifter

At dei fleste bygder vil ha fleire område bedrifter kan etablere seg på, viser innspel til den nye kommuneplanen som er under arbeid. Av totalt rundt 150 innspel, er ein god del nye næringsareal i dei ni bygdene.

Med utgangspunkt i arealet som er i den gamle planen, og at kvar bedrift har bruk for 10 dekar i gjennomsnitt, er det plass til 200 nye bedrifter.

Uavklara Skjold

Men ein stor del av arealet er lite attraktivt og heller ikkje bygt ut.

Skjold er ei bygd med lite næringsareal, og dei som er aktuelle, er litt fram i tid. For tomteland som er peika ut tidlegare, er det også mangel på interesse frå grunneigarane si side.

Av innspel for bygda i vest, er eit område på Liaheia pluss Beitaneset aust for tunnelen under Vikaneset. Det siste er på sørsida av drivhusa, og har vore tatt opp tidlegare utan å få gjennomslag, blant anna fordi ei utbygging er med på å strekkje Skjold ytterlegare geografisk. Eit næringsområde nær Isvik er ikkje avklara.

Imsland er eit eksempel på at heile Vindafjord-geografien vil ha utvikling og bedrifter. I dette området er det spelt inn i alle fall fire nye område for næring på strekninga Ølmedal til Rønnevik.

Tre i Ølen

Rådgivar Sissel Årvik i plan og areal i Vindafjord kommune opplyser at dei skal vurdere alle innspel og om dei skal få innpass i den nye planen. Ho seier at det er opp til aktørar og grunneigarar om det som får plass i planen, munnar ut i ein realitet etter kvart.

I Ølen er Fikse og Nerheim på bordet som næringsområde, og på sørsida av E134 ved Fatland Ølen AS.

I Ølensvåg er eitt område på oppsida av bustadfeltet Vågshagen spelt inn, strategisk plassert ved eventuell ny E134. I tillegg eit område ved sjøen mellom Ølen og Ølensvåg ved Myrane.

På Bjoa er eit område ved Granberg AS lansert, og det same gjeld mellom Sandeid og Vikedal. I Vikedal er det foreslått eit område ved Vikedalselva litt opp frå sentrum.