Brørne tok kontrollen sjølv

— Det første året har vore veldig bra. Me har fått godt med førespurnader og er veldig fornøgde, seier Matias Roa Berge.

Han og broren Joakim oppretta Roa Bygg i fjor vår. Dei er begge utdanna tømrarar, og Joakim vann NM-gull som årets lærling i 2022.

Sjølvstende og utvikling

Brørne er frå Ølen og tek på seg oppdrag rundt omkring i regionen. På det første året deira har det blitt jamt og trutt med oppdrag. Dei har enno ikkje måtta ta fri grunna mangel på arbeid. Ideen om å starte for seg sjølv var langt frå spontan.

— Me har alltid hatt lyst til å gjere det. Heilt sidan me starta i lære har me hatt det i bakhovudet, fortel Joakim.

Oppsidene dei ser med å drive firma er mange. Matias trur han og broren klør litt for mykje i fingrane til å berre vere tilsette. Han likar å få alle oppgåvene i eitt. Dei får gå og sjå på moglege prosjekt før dei hiv seg på, rekne ut prisar, og så snikre. Matias seier at ein kan utvikle seg meir ved å vere med heile vegen frå start til slutt i prosjekta. Dette meiner han at dei lærer meir av og blir meir sjølvstendige av.

Hovudstrategien deira er å gjere kvart prosjekt ferdig før dei begynner på det neste. Snikringa gjer dei på dagtid, mens dei bruker kveldar på kontorarbeid og synfaring av moglege framtidige prosjekt. Joakim fortel at dette går ein del utover fritida, men understrekar at dei likar det dei held på med og at det går fint.

— Når ein begynner med eit nystarta firma, strekker ein seg langt for å ha fornøgde kundar, seier Matias.

Stort og smått

Når brørne møter Grannar, er dei i sluttfasen av eit større renoveringsprosjekt i Vikedal. Her har dei etterisolert huset, bytt tak og vindauge og kledd på med ny kledning. Dei hadde jobba i fem veker og såg for seg å bli ferdige innan halvannan veke.

Eit eksakt tal på kor mange oppdrag dei har hatt så langt, har brørne ikkje på ståande fot, men det har vore jamt og trutt med prosjekt. Dei tek på seg alt frå små oppussingsprosjekt til totalrenovering og nybygg. Dei minste oppdraga, som skifte av vindauge og terrassebygging, tek typisk eit par arbeidsdagar å fullføre. På nokre prosjekt har dei samarbeidd litt med faren Roger Berge i Berge Byggservice. Matias forklarar at dei hjelper kvarandre litt om det passar.

Joakim og Matias sitt største prosjekt så langt var å bygge eit hus på Bjoa frå botnen av. Spurt om ambisjonane sine på kort sikt, svarar brørne at dei gjerne kunne tenkt seg å jobbe meir med einebustadar.

— Folk som sit på tomter må gjerne ta kontakt. Me kan hjelpe dei med alt frå A til Å i prosessen, seier Matias.

Han seier at dei kjenner til arkitektar og har høve til å vere med og teikne. Brørne veit også kven dei vil bruke av underentreprenørar som elektrikarar, røyrleggarar og fleire. På lang sikt ønskjer dei å vekse i eit roleg tempo. Dei er ikkje sikre på om dei vil utvide, men dei er ikkje imot å bli fleire heller.

— Dersom me kjem over dei rette folka, kan det hende at me vil tilsette dei, avsluttar Joakim.