Samferdsel
Blir med i Hordfast-selskap
Det var brei semje i formannskapet om at Vindafjord bør bli med i organisasjonen Stavanger2Bergen. Spørsmålet om kor tungt kommunen skal inn i selskapet, skapte likevel debatt.
— Er det noko me treng, så er det gode samarbeidsprosjekt på Vestlandet som er med og riggar oss til å stå imot at veldig mykje hamnar rundt Oslo-gryta. Dette er eit prosjekt som riggar for det, og vil vere med og bidra til ei god utvikling for Vindafjord, sa varaordførar Gustav Løge Fosse (KrF) i eit formannskapsmøte 8. april.
Med sju mot to stemmer gjekk formannskapet, slik kommunedirektør Yngve Folven Bergesen foreslo, inn for at kommunen skal kjøpe fem aksjar i selskapet Stavanger2Bergen AS, til ein samla verdi av 100.000 kroner. Aksjekjøpet skal finansierast med midlar frå det generelle disposisjonsfondet, og kommunen føreset at dette ikkje forpliktar til framtidige driftstilskot.
Annonse
Saka går no vidare til endeleg vedtak i kommunestyret 29. april.
Skepsis til storleiken
Stavanger2Bergen AS, tidlegare Hordfast AS, er ein organisasjon som jobbar for realisering av ferjefri E39 på strekninga Stavanger–Bergen. Hovudelementa i å potensielt få til dette er dei store prosjekta Rogfast og Hordfast.
Rogfast er eit vegprosjekt under bygging på E39 som vil gje ferjefritt vegsamband mellom nord og sør i Rogaland under Boknafjorden, og er estimert å opne i 2033. Hordfast er eit planlagt ferjefritt samband på E39 mellom Stord og Os i Vestland. Visjonen i prosjektet er å kutte reisetida mellom Stavanger og Bergen frå fem timar i dag til to timar, om både Rogfast og Hordfast blir realisert.
Annonse
Saka skapte debatt i formannskapet. Anna Klette Steinsland (Vindafjordlista) stilte spørsmål ved både den korte saksutgreiinga og dei langsiktige konsekvensane for regionen.
— Det er ingen tvil om at dette er eit viktig prosjekt for transport og logistikk, og kan ha andre positive ringverknadar for regionen, men det er heller ikkje udiskutabelt, sa Steinsland.
Dette illustrerte ho med naturinngrep, kostnadar og moglege negative effektar for Haugesund som regionsenter, til dømes for flyplass og handelslekkasje til Bergen og Stavanger. Steinsland reflekterte over at Haugesund berre har ein aksje.
I lys av det tenkte ho at det kanskje hadde vore naturleg for Vindafjord å vise at dei er positive til prosjektet og vil følgje det vidare, men at fem aksjar kanskje er å gå litt tungt inn. Ho føreslo difor at kommunen berre kjøper éin aksje for 20.000 kroner.
Ønskjer samarbeid
Ordførar Ole Johan Vierdal (Sp) gjekk klart imot forslaget frå Steinsland. Han frykta kva ringverknader det ville ha for kommunar på Vestlandet si vilje til å støtte Vindafjord i andre saker.
Annonse
— Det me signaliserer med Anna sitt forslag, er dessverre litt feil – at me har nok med vårt eige over Haukeli og forventar at dei andre skal støtte oss fullt der, men me vil ikkje støtte dei fullt ut tilbake. Det er dessverre det ein oppnår med det forslaget, trur eg, sa Vierdal.
Han peika også på at eit styrka vegnett mellom Stavanger og Bergen vil gjere Haugalandet til eit sentralt knutepunkt i ein viktig transportkorridor. Ordføraren sa seg einig med Øyvind Halleraker, dagleg leiar i Stavanger2Bergen, sine tankar om å stå saman, etter modell frå E134 Haukelivegen AS, som jobbar for utbetringar av E134 med medlemskommunar frå Asker til Karmøy.
Vil vite meir
Modolf Haraldseid (H) ser saka litt som å kjøpe seg politisk godvilje. Vidare viste han til at Vindafjord tidlegare har peika på at dei ikkje har nok venner til å få gjennomført dei prosjekta som er viktige for seg, slik som E134, og trur denne saka har betyding i den samanhengen. Han poengterte at også Klette Steinsland sitt forslag ville gjere at Vindafjord er med. Til kommunestyremøtet ønskte han å få meir informasjon om kva andre kommunar gjer, men støtta kommunedirektøren si innstilling for denne gongen.
Øyvind Valen (Ap) støtta Steinsland sitt forslag i denne omgang, men signaliserte at han kan snu i kommunestyret. I likskap med Haraldseid ønskjer han klarheit i kva andre relevante kommunar gjer. Vierdal fortalde at han hadde vore i e-postkontakt med Karmøy og Haugesund, men førebels ikkje fått svar. Han meiner å hugse at Haugesund sin låge del heng igjen frå at dei hadde ein aksje i Hordfast AS frå tidlegare.
I munnleg kontakt med Etne hadde ordføraren fått høyre at dei ikkje var komne så langt at dei skal behandle spørsmålet om eventuell medlemskap i Stavanger2Bergen, men at dei gjerne vil sjå på det etter kvart.
