Bjoa og Imsland håpar på politikarane
Ikkje uventa, men likevel skuffande, meiner leiar Hanne Eikemo Imsland i FAU ved Imsland skule om tilrådinga om å avvikle skulen. Også FAU-kollega Bente Skålnes Sandsgård på Bjoa meiner skulane må få ein sjanse.
— Det er ikkje overraskande med dette forslaget, men det er bra at kommunedirektøren innser at det er viktig å ha barnehagen, seier leiaren for foreldreutvalet i Imsland.
Som på Bjoa blir det SFO i tilknyting til barnehagen dersom skulen blir lagt ned.
Annonse
I forslaget som gjekk ut på høyring, skulle både barnehagen og skulen i Ølmedal ryke.
— Det var heller ikkje uventa at det er dei små bygdene det går over. Eg veit ikkje korleis kommunedirektøren tenkjer, seier Hanne Eikemo Imsland.
Grannar fekk ein kommentar kort tid før avisa gjekk i trykken i går, og ho var enno ikkje kjent med den endelege innstillinga som kommunedirektøren presenterte i går ettermiddag.
— Bygdene står saman
Annonse
Leiar Bente Skålnes Sandsgård i FAU på Bjoa meiner det er positivt at barnehagen får overleve i forslaget, og no vil dei fortsetje kampen for skulen opp mot politikarane som har siste ordet.
— Eg håpar ikkje politikarane har senka skuldrene og godtar forslaget fordi det er meir moderat enn det første som vart lagt fram. Det fine i høyringsrunden er at det er samstemt på tvers av bygdene at bygdene må ha skule. Synspunkta gjekk i stor grad på kommunen under eitt, og si eiga bygd vart ikkje nemnt, seier Sandsgård.
Ho håpar det blir lettare å få politikarane i tale no når kommunedirektøren er ferdig med jobben sin.
Saman med leiar i Bjoa bygdeutviklingslag, Harald Hetland, har ho levert ei omfattande grunngiving for at det er ein dårleg ide å avvikle skulen i bygda.
Skyte seg i foten
Eikemo Imsland viser til at det er mobilisering i dei minste bygdene i Vindafjord for å snu utviklinga med fallande folketal over tid.
Annonse
— Vi burde uansett få betre tid på oss når det blir jobba godt for å få tilflytting. Det er potensial for å få det til og fleire unge har flytta tilbake, og fleire vil kome. Det er i alle fall sikkert at det er mindre aktuelt å flytte tilbake dersom skulen blir lagt ned, seier Eikemo Imsland.
Ho deler synspunktet om at det er ei grense for kor liten ein skule kan bli, men ho meiner Imsland ikkje er der enno.
Dersom Senterpartiet skulle bli freista til å støtte kommunedirektøren, trur ho ikkje dei har mange stemmer igjen å hente i Imsland.
— Det trur eg blir å skyte seg i foten, seier Hanne Eikemo Imsland.
