Biogassfabrikk på høyring

Dette opplyser Statsforvaltaren i Rogaland på si nettside. Høyringsfristen for folk til å senda inn meininga si til Statsforvaltaren er 23. mai. Søknaden blei sendt 25. oktober 2024.

Biovind blei etablert av Rune Furseth i 2014 og fekk seinare med seg dei lokale eigarane Biobonden, Fatland, Nortura og Kjell Thomas Kirketeig. Selskapet fekk i 2023 45 millionar kroner i Enova-støtte, og i 2024 kom det spanske biogasselskapet Heygaz inn som hovudaksjonær med 70 prosent eigarskap. Heygaz er eigd av det franske investeringsselskapet Infravia Capital, som òg eig Molgas og Renevo.

Gradvis opptrapping

Biogassanlegget skal handtera husdyrgjødsel og organisk avfall. Statsforvaltaren opplyser at Biovind planlegg for mottak og behandling av 226.000 tonn per år av følgjande typar gjødsel og organisk avfall, også omtalt som substrat:

• 188.000 tonn husdyrgjødsel (storfe, svin og kylling).
• 10.000 tonn fiskeslam og 2.000 tonn fiskeensilasje.
• 13.500 tonn slakteriavfall (blod, mage/tarm, fett/protein).
• 10.000 tonn matavfall frå stor- og småhushaldningar.
• 2.500 tonn kassert kraftfôr.

I søknaden skriv Biovind at dei forventar ei gradvis opptrapping av mengd og typar substrat. Matavfall vil krevja eit eige forbehandlingstrinn for å fjerna emballasje/plast.

Fokus på lukt

Statsforvaltaren skriv at ein kan rekna med noko lukt frå anlegg som handterer organisk avfall og gjødsel. Biovind planlegg å reinsa lukta frå anlegget gjennom luktreinsetrinn. Mottak, lasting og lossing skal gå føre seg innandørs. Det er utført luktspreiingsberekning og ein luktrisikoanalyse.

Prosjektleiar Johnny Ødegård orienterte formannskapet i Vindafjord om planar og framdrift i desember 2024. På spørsmål frå Mats Årvik (Frp) svara Ødegård at det er ekstremt viktig for Biovind å ta lukt på alvor.