Bilde som kom godt med

Det er ikkje første gongen Torstein Haugen frå Ølen deler sin kunnskap om plantar med sine lesarar. Tidlegare har han gitt ut bøker om planteliv i Stranddalen i Ryfylkeheiane, og vore medforfattar av to bøker om planteliv i Vindafjord og Rogaland saman med vindafjordingen Lars Dalen. Men denne gongen er det meir eksotiske planter som prydar boksidene.

I si siste bok Bibelens planteverden jamført med floraen i Etiopia, tek han utgangspunkt i planter frå dei gamle bibelske områda og samanlikna dei med floraen i Etiopia der han jobba frå midt på 1970-talet til byrjinga av 1990. Mesteparten av teksten til dei talrike plantesortane er samla frå tidlegare bokverk signert mellom anna Astri Frisak, som i 1969 skreiv boka Plantene i Bibelen, og Michael Zohary si bok Plants of the Bible, medan dei fargerike bileta er fanga på kameralinsa av forfattaren sjølv under sine mange reiser i Afrika og bibelske område.

Resultatet er blitt ei informativ bok på over 200 sider med tema som bibelske landskap, kultur og levemåte sett i forhold til Etiopia, husdyrhald og åkerbruk i det gamle og det nye testamentet og ikkje minst ei detaljert oversikt over plantelivet.