Ber om at sjøkabel skal greiast ut

— Eg har fått mange innspel om sjøkabel. Sidan me er tidleg i prosessen, bør me spele det inn no, sa Monica Nesheim (Sp), som fremja forslaget i formannskapet i Vindafjord.

Statnett har meldt til NVE at dei vil byggje to nye 420 kV-linjer mellom Sauda og Gismarvik. Linjene går gjennom Etne og Vindafjord og skal erstatte dei gamle 300 kV-linjene frå 1960-talet.

Modolf Haraldseid (H) peika på at det er sjø nesten heile vegen linja skal gå, og at sjøkabel kan vere ein visuell fordel.

Planane har ifølgje Nesheim skapt stort engasjement i heile Vindafjord. Det var nesten fullt i Ølen kulturhus då Statnett og Noregs vassdrags- og energidirektorat (NVE) arrangerte eit folkemøte 11. mars.

Sidan ledningen går gjennom Vindafjord kjem kommunen med ein uttale. Kommunedirektør Yngve Folven Bergesen fekk støtte av eit samla formannskap på sine tre foreslåtte vedtakspunkt:

1. Vindafjord kommune sluttar seg til det utgreiingsprogrammet som ligg føre og vil vise til kommunen sin informasjon om planlagt arealbruk (kommuneplanen sin arealdel er på høyring), registrerte friluftslivsområde og arbeidet med kommunedelplan for naturmangfald som nyleg er starta. Dette vil vere viktig kunnskapsgrunnlag i utgreiingsarbeidet.
2. Kommunen har innspel på at også Vikedal er eit aktuelt standpunkt for visualisering av trasear, og ber om vidare dialog for val av representative fotostandpunkt for visualisering av linjetrasane.
3. Kommunen har innspel på trasealternativa 1.4, 2.4 og 2.5 og ber om at desse blir nærare vurdert og utgreidd.

I tillegg til desse blei Nesheim sitt punkt om sjøkabel, så vel som eit der kommunen ber om ei ny vurdering på om det er mogleg å nytte eksisterande linjetrase og greie den ut som eit alternativ, samrøystes vedteke. Varaordførar Gustav Løge Fosse (KrF) fremja forslag om eit punkt der kommunen skulle be om at det blir vurdert eit traséalternativa litt lenger inne i Vatsfjorden. Dette blei nedstemt med seks mot tre stemmer.

— Ikkje optimalt

Det er to hovudalternativ for traséval, alternativ 1.0 og 2.0. Hovudalternativet 1.0 kjem inn i Vindafjord og går vestover på nordsida av Roaldkvamsnuten, held
seg i høgda og går via Apelandsfjellet, før det kryssar dalføret sør for Helgeland. Statnett har meldt to alternativ frå dette punktet. (Alternativ 1.1 som går sør for Hovda og alternativ 1.2 som går nord. Det nordlege alternativet deler seg igjen opp i to alternativ; eit på austsida av Døldarheia og eit vest for fjellpartiet).

— Begge desse to sistnemnte synest ikkje (på dette stadiet) å vere optimale med tanke på visuell påverknad, skreiv Folven Bergesen i saksinnkallinga.

Han vil spele inn eit alternativ, 1,4, som han ønskjer utgreidd I dette alternativet blir Sandeid mindre berørt enn ved alternativ 1.1, samstundes som ein unngår dei to nordlegaste alternativa. I tillegg bør det etter hans oppfatning også sjåast på moglegheita for å krysse dalføret i stor høgde for å redusere påverknaden.

Utfordrande for næringsverksemd

Hovudalternativ 2.0 går gjennom Vindafjord lengre sør. Den austleg del av traseen, frå kommunegrensa med Etne og fram til Hestanipen i Vikedal, berører fleire kartlagde friluftslivsområde og merka og skilta turstiar. Traseen går gjennom Bjønndalen og berører friluftsområda knytt til turmåla Bjønnstigen og Sjurstølen i aust.

Vidare i sørvestleg retning går traseen over Ulvavoll og vil berøre turmåla Ulvavollsvatnet og Ulvavollsnuten. Før kryssing av Vikedalsdalen, berører traseen turstien til Skomakernibba og på andre sida av dalen går traseen over Hestanipen.

Denne austlege delen av hovudalternativ 2.0 rører vesentleg ved tema friluftsliv og natur i eit område som har avgrensa inngrep i dag. Av den grunn foreslår kommunedirektøren eit alternativ 2.4 som koplar alternativ 1.0 saman med underalternativ 2.1 vest for Fjellgardsvatnet og følger derfrå i lia aust for Lysenuten.

Hovudalternativ 2.0 kryssar også Vatsfjorden ved Raunes. Folven Bergesen skriv at dette kan vere utfordrande med tanke på den eksisterande og planlagde næringsverksemda til AF Decom. I meldinga går traseen i ein bue mot sør, ifølgje Statnett fordi ein må krysse fjorden frå høgda nedom Gaupefjellet. Kommunedirektøren har sett på eit alternativ, 2.5 som vil gi ei fjordkryssing litt lengre nord.

— Det vil vere mogleg frå om lag same høgde på eit framspring i terrenget ovanfor Åsadalen, men det vil gi eit noko lengre spenn over fjorden, skriv Folven Bergesen.

Han meiner også dette alternativet bør sjåast nærare på og vurderast utgreidd. I konklusjonen sin skriv Folven Bergesen at forslaga til tre alternative trasear er spelt inn med avgrensa kompetanse om kva som er praktisk mogleg å gjennomføre, men kommunedirektøren håpar at dette er reelle alternativ som Statnett vil sjå nærare på og eventuelt utgreie.