Badstufeber på Bjoa

Vêret viste seg frå si beste side då bjoabuen samla seg til opning av den nye badstua. Sola skein frå ein skyfri himmel og temperaturen i sjøen kraup opp mot 18 grader. Det passa perfekt for alle som ønskte å kombinera ein dukkert med eit varmande sveittebad i sjøkanten.

— Eg vil starta med badstua, så blir det bading etterpå, seier Gro Johannessen og finn fram badedrakten.

— Dette blir kjempekjekt og eg ser fram til mørke vinterkveldar med badstubading. Det blir nok sjøbad då også, seier ho.

Bjoadama er ikkje aleine om å testa badefasilitetane i Vedvikjo denne føremiddagen. Små og store har funne vegen til badeplassen og nyt dagen med bading, soling, kaffikos og leik.

— Eg teiknar. Eg skal ikkje bada, seier 6 år gamle Ingeliv Klette Steinsland og viser fram ei teiknebok ho har lånt i utlånsbua ved badeplassen.

— Bua har vore open sidan i fjor sommar. Her er leiker, teikneutstyr og anna. Den er mykje brukt, forklarar mor Anna Steinsland.

Bjoa Bygdeutviklingslag

Bjoa Bygedutviklingslag står bak badstuprosjektet, og på opningsdagen inviterer dei til badstubading og kaffikos med nysteikte kaker på menyen. Den nye badstua føyer seg inn i ei lang rekkja av nyervervingar det siste året.

— I 2024 fekk me på plass ein grill, bu med utstyr og ei badeplattform. I år har me grøfta og fått på plass ei badstu. Målet er at fleire skal bruka badeplassen, seier Anne Sofie Sandvik som saman med Anna Steinsland og Katharina Håvarstein lanserte ideen om ein sauna ved sjøen.

Badstua er plassert på ein tilhengjar og har sitjeplass til maks åtte personar. Ein vedfyrt omn syt for varme i det vesle mobile huset som er plassert i skogkanten få meter frå stranda.

For å finansiera det nye badeprosjektet søkte Bjoa Bygdeutviklingslag om midlar og fekk støtte frå SR-Bank, Vindafjord kommune og Yogafarmen på Bjoa. Totalt har badstu, utstyrsbu, grill og badeplattform ein prislapp på rundt 500.000 kroner inkludert dugnad. Sjølve badstua inkludert tilhengjar kom på 280.000 kroner.

— Me har fått 185.000 kroner i støtte. Me håpar på meir støtte, seier Sandvik.

Privat grunn

Friluftsrådet Vest tek seg av vedlikehald av badeplassen på Vedvikjo. Dei har også montert både badeplattform, grill og utstyrsbu for bygdeutviklingslaget.

— Me har betalt og dei har sett opp. Me har hatt godt samarbeid med friluftsrådet, seier Sandvik.

Sjølv om badstua står like ved badeplassen er det takk vera ein velvillig grunneigar at bjoabuen nå kan nyta eit varmande saunabad.

— Me har ikkje lov til å ha noko som me tek pengar for på friluftsrådet sitt område. Men me fekk avtale med grunneigar Thorleif Stensen, seier Sandvik og takkar grunneigaren for hans velvilje.

For Stensen sjølv er det berre ei glede å få låna ut grunnen til felles glede for bygdefolket, og kanskje kjem han også sjølv til å nytta seg av badstutilbodet når han skal samla vennegjengen til fest utpå haustparten.

— Dei har fått ein ein avtale for to år. Dette er eit kjempepositivt tiltak. Dei er så flinke her på Bjoa, seier Thorleif som har si faste adresse i Tysvær.

— Eg vaks opp på Bjoa og me brukar heimplassen som landstad. Det er kjekt at dei spurde om å plassera badstua her. Eg håpar den blir mykje brukt. Eg har planar om ein vennefest her, seier han.

Eige ansvar

Alle som ønskjer å ta seg eit badstubad kan bestilla time på Bjoa Bygdeutviklingslag si heimeside. Då må dei sjølv fyra opp i omnen og ta seg av reingjering etter bruk. Ei dugnadsgruppe på ni personar skal dela på ettersyn, men kvar enkelt leiger på eige ansvar.

— Me har fellesbading med påmelding kvar laurdag, men dei som bestiller privat må syta for fyring og vasking sjølv. Badstua er open frå klokka 8 til 22 kvar dag, seier Sandvik.