AutoStore på Time si prestisjefylte liste

Kåringa frå Time omfattar i år 300 oppfinningar frå ulike delar av verda. Lista blir sett saman etter vurdering av originalitet, effekt, ambisjon og innverknad. Oppfinningane spenner frå kunstig intelligens og robotikk til helse, miljø, energi, transport og forbrukarteknologi.

Magasinet skriv at årets utgåve er den største i historia til kåringa, og at målet er å løfta fram teknologi og idear som gjer verda betre, smartare og meir underhaldande».

AutoStore sin robotikk-suite

AutoStore blir omtalt i Time for sitt robotiserte lagersystem, kalla AutoStore Robotics Suite. Systemet kombinerer robotar, kubestruktur og programvare for å lagra og henta varer på mest mogleg effektiv måte.

Løysinga blir brukt i detaljhandel, netthandel og industri, og er kjent for å gi høg lagringstettleik og presis automatikk på små areal. Ifølgje AutoStore kan systemet gi opptil fire gonger høgare lagringskapasitet enn tradisjonelle lagerløysingar, utan å krevja meir plass.

Nye teknologiar

Time trekker fram fleire av dei nyaste produkta frå AutoStore som grunnlag for plasseringa på lista:

CarouselAI – ein robotplukkar som nyttar kunstig intelligens for å identifisera og plukka varer automatisk.

VersaPort – ei fleksibel arbeidsstasjonløysing som gjer det mogleg å utføra fleire typar operasjonar frå same port.

Oppgradert programvare – eit styringssystem som koordinerer robotar, lager og plukkstasjonar for å optimalisera effektivitet og drift.

Desse innovasjonane utgjer samla det Time omtalar som a smarter way to store, pick, and move goods» – eit system som kombinerer presisjon, skalering og kunstig intelligens i ei samla løysing.

Global suksess

AutoStore blei etablert i Nedre Vats på 1990-talet, og har utvikla seg frå lokal idé til global teknologibedrift. Ifølgje selskapet sjølv er det no installert over 1.750 AutoStore-system i rundt 60 land, med meir enn 44.000 robotar i drift. Desse robotane flyttar over 2,5 milliardar produkt årleg for kundar verda over.

Hovudkontoret ligg framleis i Nedre Vats, mens selskapet har regionkontor i Europa, Asia, Australia og Nord-Amerika.

Ein del av norsk teknologieksport

AutoStore har dei siste åra hatt rask vekst og blir rekna som ein sentral aktør innan norsk teknologieksport. Kåringa frå Time plasserer selskapet blant verdas mest framtidsretta teknologiselskap i 2025.

Ifølgje Time viser årets liste korleis teknologi frå ulike delar av verda påverkar måten me jobbar, handlar og lever på – og AutoStore blir trekt fram som eksempel på korleis robotikk og AI endrar moderne lagerlogistikk.