Auka overskotet med 46 millionar

— Me er fornøgde med å levera eit betre resultat trass i eit krevjande kostnadsbilete, seier konsernsjef Vidar Fatland i Fatland Gruppen AS i ei pressemelding frå konsernet.

Konstandsvekst

Fatland Gruppen AS er Noregs nest største kjøtbedrift. Konsernet har verksemd i Ølen, Jæren, Oslo, Sandefjord, Oppdal og Voss, og sysselset nær 1.000 tilsette.

I pressemeldinga skriv Fatland at dei òg opplevde auka kostnader, mellom anna som følgje av høgare lønskostnader og andre driftsutgifter. Likevel lukkast konsernet med effektiviseringstiltak som bidrog til å styrkja resultatet samanlikna med året før.

— Dette viser at me er konkurransedyktige både ut mot bonden og i marknaden generelt, seier Vidar Fatland.

Han legg til at konsernet har eit klart mål om å vera ein trygg og føreseieleg samarbeidspartnar for bonden, dei tilsette og kundane, samstundes som me skal vera effektive og lønsame i alle ledd av verdikjeda.

Satsar stort

Avslutningsvis i pressemeldinga skriv Fatland at dei vil halda fram med å investera i bedrifta dei komande åra, med særleg fokus på teknologi, auka kapasitet og moderne løysingar.

— Me skal vera best mogleg rusta for framtida. Me ønskjer å levera både på produktivitet og kvalitet, seier Vidar Fatland.

I juni starta bygginga av Fatland sitt nye produksjonsanlegg i Ølen, som er venta ferdig i 2027. Kontrakten med Helgesen Tekniske Bygg (HTB) er verdt 213 millionar kroner ekskludert mva. I tillegg vil innreiing kome i tillegg. Bruttoarealet kjem til å vere 11.750 kvadratmeter, samt 3.200 kvadratmeter teknisk himling. Materiala dei nyttar til bygging er hovudsakleg betong og metall.

— Dette er det største tilbygget me har bygd til no. Bygget vil gi oss høve til å doble produksjonen i alle ledd – slakting, skjering, foredling og pakking, sa styreleiar Svein Fatland i Fatland Gruppen tidlegare i sommar.

Fatland-konsernet er eigd av fjerde generasjon i slekta til Rasmus Fatland, som starta med slakting i Vikedal kring 1892. På nettsida si skriv Fatland at det første slakteriet vart bygd av Helgevold i Sandeid i 1937, eit anlegg grunnleggjaren sin son Severin Fatland overtok i 1947. Slaktemengda auka, og Fatland bygde nytt slakteri i Sandeid i 1957. Nye krav til slakteria og stadig fleire leverandørar førte til at Fatland bygde eit nytt slakteri i Ølen i 1974.