Årsmarkering blei folkefest

— Det var kjekt å bli gjort stas på. Eg håpar det skjer igjen, sa Annika Tökés Krokå etter arrangementet.

Karateutøvaren var ein av seks NM-vinnarar i 2024 som blei gjort ære på framfor publikum. Ho konkurrerer for Etne Kyokushin karateklubb og vann U14-klassen for dei under 60 kilogram i fullkontakt i Kristiansand i mars.

Innhaldsrikt år

Søndagens arrangement heiter ordføraren si nyttårsmottaking, og det har blitt ein populær tradisjon. Her blir kulturinnslag blanda med heider av lokale personar, så vel som refleksjon. Etterpå fortalde Vierdal at det totalt var 320 seter og stolar. Med berre nokre få ledige under arrangementet kom det dermed truleg opp i rundt 300 tilskodarar.

Anni Alida Sunde (8), Ella Hustveit (8), Engla Nilsen Riber (8), Hannah Fosse (9), Jenny Haaland (9), Karoline Klungtveit Andersen (8), Rebekka Fjelltveit (9), Tiril Berge Opheim (8) og Una Espeland Grønstad (10) i Vindafjord kulturskule si dansegruppe fekk i gang festkvelden med eit opningsnummer. Så heldt Vierdal ei innleiing om 2024. Han poengterte at det var eit år der mykje skjedde.

— Saker som skulenedlegging og vindmøller skapte stort engasjement, sa Vierdal.

På den positive sida trakk han fram at Vindafjord kommune passerte 9.000 innbyggjarar, sjølv om han understreka at det trengst fleire unge. Han sa at Haugalandet og Vindafjord har ei unik plassering mellom Stavanger og Bergen, med havet like utanfor.

Viktig med dei som heiar

Noko anna som er unikt med Vindafjord, er at tre av dei 169 representantane på Stortinget er frå kommunen. Tidlegare år har det vore ein hovudtalar, men i år var det bytta ut med ein panelsamtale der Terje Halleland (Frp), Tove Elise Madland (Ap) og Lisa Marie Ness Klungland (Sp) svarte på spørsmål frå Vierdal.

Alle dei tre lokale stortingsrepresentantane snakka positivt om samarbeid på tvers av partigrensene. Halleland poengterte at organiseringa på Stortinget, der dei sit på plassar og ikkje etter parti, kan vere bra for dette. Ness Klungland framheva at ho bruker mykje av dagane på å snakke med personar, og kor lett det er for vanlege folk å nå representantane sine.

— Ting dokke seier til oss, kan bli politikk, sa Ness Klungland.

Etter politikarane underheldt David Irmia Hågensli frå Vindafjord kulturskule publikum på piano, før det var tid for kake og kaffipause. I pausen fekk folk kikke på ei kunstutstilling laga av vaksne kunstverkstaddeltakarar ved kulturskulen.

Henning Aarekol starta andre del av arrangementet. Han blanda vitsar med seriøse poeng om fellesskap og kjensler. Han viste til sitatet om at det trengst ein landsby for å oppdra eit barn, og oppmoda folk i Vindafjord til å engasjere seg i fritidsaktivitetane til dei unge.

— Det betyr noko med dei som heiar, sa Aarekol.

Går for EM-gull

Leiar Anne Cecilie Berentsen i Utval for oppvekst og omsorg hadde æra av å dele ut og lese opp grunngjevinga for omsorgs- og inkluderingsprisen og dei to kulturstipenda. Ekteparet Ingeborg og Gudvin Vågen vann omsorgs- og inkluderingsprisen, og fekk eit måleri av Olalia, som er måla av Jan Terje Rafdal.

Skiløparen Tobias Aarekol og kampsportutøvaren Daniel Amundsen fekk kvart sitt kulturstipend på 15.000 kroner. Aarekol var sjuk, så faren Runar tok imot stipendet. Amundsen synest det var kjekt å få stipendet, og fortalde etter arrangementet at det gjer det lettare for han å reise på konkurransar. Om to veker skal han til EM i Lisboa.

— Eg går for å vinne, sa Amundsen.

Det blei gitt merksemd til Vindafjord sine seks NM-vinnarar i 2024. Annika Tökés Krokå vann U14-klassa i fullkontakt karate, Amalie Aarekol vann U16-klassa i NM for lag i volleyball, Bertine Skipevåg Tveit tok sandvolleyball-gull for både U19- og U21-klassen, Aleksander Berntsen vann NM i lagsjakk i VGS-klassen, Ida Maria Ørnes vann gull i riding og Aurelia Perednis blei noregsmeister i veteran-NM i styrkeløft.

I tillegg blei det gjort heider på NMK Vikedal, som blei kåra til årets arrangør under Norges Bilsportforbund sin bilsportgalla, og AutoStore sitt lag, som vann den nasjonale toppligaen for bedriftslag i dataspelet Counter-Strike.

Til slutt var det konsert med Torbjørn Økland og gjestane Jan Toft, Gjertrud Økland, Halvor Lillesund, Rudolf Fredly, Vegard Fossum og Kjetil Ulland (lyd).

— Variert og kjekt

Etter arrangementet summerte ordførar Ole Johan Vierdal opp kvelden som kjempebra. Han viste til at folk skrøytte og var fornøgde. Det gjekk igjen hos dei Grannar snakka med også.

— Dette var ein skikkeleg triveleg kveld, sa Jon Olav Velde.

Han gleda seg over at naboane Ingeborg og Gudvin Vågen vann omsorgs- og inkluderingsprisen. Det synest han var vel fortent. Også Anne Line Granberg synest kvelden var god. Ho meiner at det var eit variert program med mykje som var kjekt, og omtalar det som eit flott arrangement.