— Alt gjekk etter planen

— Det var flott å få kongeparet på besøk. Alt gjekk etter planen, så me er ganske stolte her me står, seier ordførar Ole Johan Vierdal kort tid etter at kong Harald og dronning Sonja har gått om bord i kongeskipet frå kaien bak Ølen Senter.

Dei møtte ei svært stor folkemengd i Ølen. Politistasjonssjef Fredrik Alvestad talfestar besøkstalet til mellom 3.000 og 4.000 personar.

Stort arbeid

Nesten over alt kor ein snudde seg kunne ein sjå tilsette frå Vindafjord kommune, så vel som sanitetskvinner frå Vindafjord, i oransje vestar som gjorde ein innsats for at alt gjekk som det skulle. Raude løparar blei kosta, besøkande ønskt velkommen og leia dei på dei rette plassane og til slutt blei det delt ut gratis bollar. Verken Vierdal eller kommunedirektør Yngve Folven Bergesen torde å sette tal på kor mange tilsette kommunen hadde i sving rundt Sjøperlo i Ølen, men dei konstaterte at det var svært mange.

— Ein del arbeid er gjort i forkant også, men det var verdt det, seier Vierdal.

Heilt sidan det blei kjent at kongeparet skulle innom Vindafjord som ei avsluttande etappe på ein fylkestur i Agder og Rogaland har kommunen jobba tett med både Det kongelege hoffet og Statsforvaltaren i Rogaland om planlegging. Statsforvaltar Bent Høie i Rogaland omtalar samarbeidet med kommunen som heilt utmerka frå dag ein til sjølve gjennomføringa. Han synest det var kjempeflott å vere på besøk i Ølen saman med kongeparet og rosa lokalbefolkninga for å ha stor hjartevarme for kong Harald og dronning Sonja.

Kledd for feiring

Sidan besøket blei annonsert har kong Harald opplevd nokre helseplagar og det blitt annonsert at han skal jobbe mindre framover. Kommunedirektør Yngve Folven Bergesen fortel at kommunen har vore litt urolege i løpet av vinteren for om det skulle bli noko av besøket i Vindafjord.

— Når me endeleg nå har gjort er det utruleg kjekt, seier Folven Bergesen om gjennomføringa av besøket.

Rundt omkring i heile sentrumsområdet i Ølen hengte det små og store flagg ute på bygningar og flaggstenger frå lenge før kongeparet kom i land. Svært mange hadde med seg flagg då dei tok imot kong Harald og dronning Sonja ved Sjøperlo.

Også på kleda merka ein at dette var ein spesiell dag. Mange barn og vaksne var kledde som om det var 17. mai. Vierdal hadde naturleg nok på seg ordførarkjede, men også kommunedirektøren utmerka seg med ein herrebunad med hatt. Han fortel at det er ein Nordfjordbunad.

— Den ber eg med stoltheit, avsluttar Folven Bergesen.