Aktiv dag for store og små
I ei heil veke har vatsbuen strøymd til den nye Vindafjordhallen for å ta del i ulike arrangement knytt til opninga av hallen. Søndag var det familien som stod i høgsetet med søndagsmiddag og mange ulike aktivitetar for barn og vaksne på programmet.
Sist måndag ver det offisiell opning av Bygdahuset i Vindafjordhallen med spesielt inviterte på gjestelista. Og sidan har det gått slag i slag med aktivitetar og arrangement for små og store nesten kvar einaste dag, før opningsveka blei avslutta med søndagsmiddag og familiedag. Familiedagen samla smekkfullt hus og både barn og vaksne let seg imponera over det flotte huset som rommar både bygdehus og svømmehall.
— Det er første gong me er her. Det er blitt knallfint. Nytt og fint, med lyse og fine lokale. Og me gler oss til å bruka bassenget, seier Olaug Urdal som er ein av mange vatsbuar som har funne vegen til den nybygde hallen denne søndagen.
Annonse
Og ho er ikkje aleine om å dra fram superlativa når ho skal beskriva det ho ser. Både barn og vaksne let seg imponere over det flotte bygget som har reist seg frå oskehaugen.
— Det er blitt så flott her. Det er bra at me har fått det igjen, seier dei to ti-åringane Tuva Lilleskog Eikeland og Sofie Fosse og gler seg aller mest til svømmehallen opnar dørene.
— Då skal me kjøpa årskort, seier dei og smiler.
Middag og kaffikos
Annonse
Nesten alle som tok turen til Vindafjordhallen denne søndagen nytta høvet til å få seg ein matbit. På menyen stod kjøttkaker med dronning Maud-pudding til dessert, og ut frå den lange køen som samla seg ved serveringsdisken såg maten ut til å falla i smak.
— Det er travelt, men kjempekjekt, seier Sissel Wollertsen medan ho deler ut kjøttkaker til svoltne sambygdingar.
Aktivitetar
Etter at middagsøkta er unnagjort set gjestene kursen mot fotballbanen. Her har idrettslaget, grendalaget, bondelaget, bygdekvinnelaget og Freidig 4H diska opp med eit variert aktivitetstilbod for både store og små, og snart er det full fart på grasmatta. Alle som vil delta på ein eller fleire aktivitetar får i oppgåve å snurra på eit lykkehjul, og når hjulet stoppar viser det kva aktivitet som står for tur.
— Eg skal kasta erteposar, seier 12 år gamle Johan Svantesvold og set kursen mot bygdekvinnelaget sin aktivitetsstand der presisjonskasting av erteposar står på programmet.
Ander prøver seg på ulike ballspel eller testar fotballferdigheitene til god hjelp frå fotballmeistarane Håvard Nordtveit og Kristoffer Haraldseid.
Annonse
Ved Vats Grendalag sin stand er oppgåva å gjetta kor mange søtsaker det er i eit glas og
tek ein turen bortom Freidig 4H sin stand kan ein få laga ein smakfull milkshake.
— Me lagar milkshake som blir rista på ein sykkel, seier Astrid Eskeland (13) og Maren Steinnes (14) i Freidig 4h og miksar saman mjølk og is før dei plasserer behaldaren bakpå sykkelen og trør i veg.
Godt besøk
Alle dei ulike arrangementa i løpet av opningsveka har vore godt besøkt og dagleg leiar for Bygdahuset er svært nøgd med interessa bygdefolket har vist for den nye storstova.
— Me har hatt program kvar dag utanom laurdag. Det har vore kjempebra og me har hatt mykje folk. Onsdag og fredag hadde me ungdomsklubb og då var det mellom 50 til 70 kvar dag, seier leiar av Bygdahuset, Karine Klungland.
Annonse
Nå håpar ho huset vil bli mykje brukt framover og at bassenget snart opnar.
— Mange ventar på bassenget. Då håpar me å ha open kiosk, seier ho.
Om det blir søndagsmiddag å få i tida som kjem er meir uvisst.
— Me har ikkje fast kokk. Me vil sjå litt på behovet, seier ho.
