— Akkurat det me treng meir av

— Det er eit fantastisk prosjekt som er akkurat det me treng meir av i åra framover. Me treng meir energiproduksjon utan å byggje ned natur. Å utnytte eit gammalt avfallsdeponi er ein glimrande måte å gjere det på, sa klima- og miljøminister Andreas Bjelland Eriksen (Ap).

Han viste til at auka energiproduksjon på ein mest mogleg skånsam måte er viktig for både arbeidsplassar og den grøne omstillinga som er sett i gang i samfunnet.

Godt samarbeid

Solkraftverket på Toraneset vil få ein kapasitet på 3 megawatt peak (MWp), og årleg kunne levere om lag 2,5 GWh til kraftnettet – tilsvarande straumforbruket til over 160 einebustader. Det er det første storskala anlegget på Vestlandet, og det første prosjektet i regi av Endra, som blei etablert av Haugaland Kraft i 2022. Planen er å komme i gang med straumproduksjon til hausten.

Besøket var ein del av programmet til ministeren i regionen, for å lære meir om Haugaland Kraft sitt arbeid med fornybar energiproduksjon og berekraftige løysingar. Spesielt solkraft var i fokus, med omvising både på det flytande solcelleanlegget i Haugaland Næringspark og på Toraneset, der bygginga no er godt i gang.

På Toraneset blei statsråden teken imot av representantar frå Haugaland Kraft-eigde Endra, HIM og SJ Sol, som er totalentreprenør for bygginga. Dagleg leiar Gro Staveland i HIM fortalde om historia til deponiet, som vart lukka i fjor sommar, og korleis det no får nytt liv som solkraftverk. Prosessen fram til byggjestart tok tre år. HIM og Endra var tydelege på at dei er fornøgde med samarbeidet.

Først ute

Endra har eit kontor i Medvind-bygget i Etne. Der sit utbyggingsleiar Sveinung Eskeland, som tidlegare har leia bygginga av eit solkraftverk i Honduras. Kraftverket på Toraneset er hans første prosjekt i Noreg. Han fortalde om korleis anlegget skal festast med naturstein – ein metode han ikkje har sett brukt andre stader.

— Me brukar tredje sorteringsstein frå Ryfylke. Det gir eit lågt miljøavtrykk og passar godt inn her. Me startar monteringa i slutten av mai, og håpar å kunne setje i stikkontakten i slutten av september, sa Eskeland.

Direktør Kristian Gautesen i Endra gledde seg over å kunne bruke den internasjonale erfaringa til Eskeland til å byggje opp eit sterkt fagmiljø. Klima- og miljøminister Andreas Bjelland Eriksen (Ap) spurde om det dei held på med på Toraneset, og lurte på om det er noko ein kan få til fleire stader. Gautesen sa at dette er eit pilotprosjekt, og ville ikkje gå for langt i lovnader om at selskapet kjem med mange like prosjekt i nær framtid.

Teknisk leiar Espen Nordtveit i Endra kalla prosjektet eit pionerarbeid.

— Solkraft er heilt nytt i Noreg, og forholdsvis nytt i verda òg. Det gjer dette ekstra spennande, sa han.

Spennande entreprenørarbeid

Sidan det første spadetaket for to månadar sidan, kan ein sjå at det har skjedd ein del på det gamle deponiet. Bjarne Nordtveit AS frå Vats er entreprenør for å leggje steinane anlegget skal byggjast på. Bjarne Nordtveit sjølv kunne fortelje at det har vore ei lærerik oppgåve.

— Det er første gong me gjer noko slikt. Framdrifta har variert med terrenget, men det har gått bra, sa han.

Son hans, Magne Nordtveit, supplerte:

— Dette er nytt for oss, men det har gått greitt. Me har vore heldige med vêret og har halde på i ein månad. Me reknar med å vere ferdige om rundt to månader.

Lærling Vegard Kvamen Låte skildra oppdraget som unormalt», men spennande.