Kultur
200 med på bygdefest
23. mars tok rundt 200 personar turen til Imsland Bygdahus for å oppleve FYK og Rossman på den årlege påskefesten. FYK-vokalist Jarle Nordtveit Åsheim var storfornøgd med kvelden.
— Stemninga var heilt supert! Publikum er som alltid fantastiske og stiller opp på konsert. Arrangementet gjekk veldig fint føre seg og det såg ut som bygdafolket hadde ein fin kveld, fortel Jarle Nordtveit Åsheim.
I tillegg til å vere vokalist i FYK er han styreleiar i Imsland Bygdahus.
Annonse
Viktig for drifta
For Imsland-bandet FYK er det ifølgje Nordtveit Åsheim eit av årets høgdepunkt å kunne spele heilt på heimebane, noko som har blitt ein tradisjon palmelaurdag dei siste åra. Ekstra kjekt synest han det var i år, då dei klarte å få med seg americana/rocke-orkesteret Rossman.
— Dei leverte ein forrykande bra konsert, synest Nordtveit Åsheim.
På Imsland bygdahus er det faste påske- og haustfestar kvart år. Styreleiar Nordtveit Åsheim omtalar desse som kjempeviktige arrangement for drifta av bygdahuset, og saman med Ølmedal Rundt blant viktigaste inntektskjeldene på arrangementsida i løpet av eit år.
Annonse
Nordtveit Åsheim opplyser at då dei starta opp att etter koronapandemien endra dei frå tradisjonell dans eller pub, til at dei to årlege festane skal ha eit meir konsertpreg. Det krev gjerne fleire folk i sving, og hadde aldri vore mogleg å gjennomføre logistisk eller økonomisk dersom dei ikkje hadde fått med seg bygdafolket på dugnadsarbeid.
— Takka vere at imslandsbuen stiller så velvillig opp kan ein fortsetje å ha slike arrangement, seier styreleiaren.
Klart for 40 årsmarkering
For bygda som heilskap trur Nordtveit Åsheim at det er veldig viktig å halde på slike tradisjonelle festar. Han omtalar at nokon er der for musikken, andre kunne ikkje brydd seg mindre om kven som spelar, mens nokon kjem får treffe gamle kjenningar.
— Summen av dette og at folk møtast på tvers av generasjonar gjer det til ein god samlingsplass, seier Nordtveit Åsheim.
Han meiner at det er viktig for ei lita bygd som Imsland å vise igjen. Derfor er bygdehuset stolte over at dei tørr å trø litt ekstra på gasspedalen og lokke til seg nasjonale band som Rossman og Vestlandsfanden til å spele i lokalet som er gymsal i vekene og festlokale når helga kjem. Vestlandsfanden spelte på haustfesten i 2022.
Annonse
Utover våren står tradisjonell 17. mai-feiring og Ølmedal Rundt 20. mai på programmet i bygdehuset. Ølmedal Rundt fyller 40 år i 2024.
— Det viktigaste og mest tradisjonsrike arrangementet på bygdahuset skal sjølvsagt markerast i samarbeid med Vindafjord idrettslag, avsluttar styreleiaren.
