Vindafjord må ta ansvar – flyktningane treng oss

Vindafjord formannskap si avgjerd om å redusere talet på flyktningar frå Ukraina til berre 30 i 2025 er skuffande og kortsiktig. Me står i ein historisk situasjon der mange menneske vert tvinga på flukt frå krig og uro. Noreg har ein lang tradisjon for å bidra humanitært, og det bør me halda fram med.

Å tilby bustad og tryggleik til flyktningar er ein viktig del av det å ta samfunnsansvar. Likevel vel formannskapet å setja eit lågare tak enn det kommunedirektøren tilrår, sjølv om staten står for finansieringa og kommunen har tilstrekkelege ressursar til å ta imot fleire.

Vindafjord og bygdene våre har mykje å vinna på å ta imot fleire flyktningar. Me treng fleire innbyggjarar for å oppretthalda og vidareutvikle skular og andre viktige tenester. Mange arbeidsgjevarar slit med å finna folk – her har me ein gyllen sjanse til å få nye ressursar inn i arbeidslivet. Flyktningane kjem ikkje berre med behov, men òg med kompetanse, arbeidsvilje og engasjement.