Til næringsminister Jan Christian Vestre

Tusen takk for eit hyggeleg to minuttars møte med deg på EnergiRike-konferansen i Haugesund tysdag.

Det som slo oss etter denne konferansen er at alt handla om å nå klimamål, grønt skifte og korleis produsere meir energi, dette hurtigast mulig.

Det kom ikkje eit ord om naturen, og korleis ein kan sikre den sterkt minkande villmarka vår. FN meiner naturkrise er minst like truande som klimakrise.

FN jobbar nå med ein Parisavtale»for naturen , med sikte på å stanse og reversere tap av naturmangfaldet i verden.

Me meiner derfor det må rettast fokus på transportvegen av den grøne krafta. Det er slett ikkje greit at flott urørt natur må blø for det grøne skiftet. Det er på tide at ein tenkjer nyaste teknologi og på dette feltet. Derfor er sjø- og jordkabel alternativ som MÅ brukast der det er mulig. Dette òg for å redusere energitapet som er mykje større i luftspenn enn i jord og sjø. Viser til Klepp kommune, der er det rekna ut at energitapet er 75 prosent meir i luftspenn enn i jordkabel. Luftspenn er sløsing med dyrebare ressursar som rein kraft er. Med dagens kraftprisar tener ein derfor inn meirkostnaden med sjø- og jordkabel på kort tid. Energitapet er det straumkundane som betaler.

Prisforskjellen mellom luft, jord og vatn er i tilfelle Blåfalli – Gismarvik ikkje reell då estimata» me har motteke frå Statnett på sjø- og jord alternativet er så sprikande. I tillegg til at sjø/jord-alternativet ikkje har vore utlyst på noko anbodsrunde til kompetente entreprenørar. Derfor kan dette ikkje kan samanliknast med luftspenn-kalkylen.

Bruk av sjø- og jordkabel har fleire fordelar, ein kuttar konsesjonsbehandlingstida vesentleg , særleg med sjøkabel då det her er færre klageinstansar, stort sett er det fylke og stat som er eigar av sjøgrunnen ut forbi marbakken.

Sjø- og jordkabel har så godt som ingen vedlikehaldsbehov og leverings-regularitet er mykje betre enn ved luftspenn. Det er sikrare enn luftspenn mot terror.

Sjø- og jordkabel er godt etablert i Noreg med vår unike kompetanse innan olje og gass industriens undervassteknologi. Her er me absolutt verdsleiande både på utstyr og norske fagfolk. Sjø- og jordkabel er framtidas framføring av energi, noko Tyskland og Danmark har skjøna forlengst. Derfor må dette vidareførast i Statnetts kommande 40 prosent utbygging av sentralnettet.

Viser til Aibel sitt føredrag på EnergiRikekonferansen. Der sjøkabel òg var tema.

Det er viktig å nytte sjø- og jordkabel òg innanlands, meir bruk sikrar vidare utvikling og kompetanse på dette feltet. Slik som Statnett/NVE styrer nettutbygginga i dag vil me stagnere både teknologisk og økonomisk.

Legg ved vår presentasjon som me hadde på den store politiske debatten og folkemøtet under Etnemarknaden den 5.august i år. Der blir det vist korleis sjø- og jordkabel kan nyttast i kraftoverføringa frå Blåfalli til Gismarvik, og dermed spare flott urørte fjell og skogar.

Grethe Tesdal
Heidi Silgjerd
Forum for sjø- og jordkabelteknologi