Omkamp om ei tapt sak?

Terje Halleland, stortingspolitikar og medlem av energi- og miljøkomiteen for FrP seier i intervju i Grannar 23.02.23 at me i Forum for sjø- og jordkabelteknologi (FSJT) utnyttar dei demokratiske spelereglane når me stadig må ta nye omkampar på allereie tapte slag. Ei sak er ikkje tapt før den er avgjort. Denne saka er ikkje ferdigbehandla, og det er vår demokratiske rett å prøve å påverke til å få sjø- og jordkabel grundig utgreia før endeleg vedtak. Halleland seier at gjengen» i FSJT må ta på alvor at denne saka har hatt si behandling i Stortinget og me bør respektere dette.

Når saka var oppe i Stortinget,var det eit dokument 8 forslag om å utgreie sjø- og jordkabel på denne kraftoverføringa. Dette vart nedstemt av AP, SP, Høgre og FrP, der Halleland frå talarstolen serverte uhaldbare fakta om sjøkabel. Dette gjentar han i Grannar med å vise til ein Menon-rapport som han tolkar at det blir mykje dyrare med sjøkabel enn luftspenn. Verken denne rapporten, Statnett eller NVE har tatt med verdien av natur i reknestykket. Tala dei kjem med er kun nåverdi investering. Verken drift/vedlikehald, effektivisering , leveringssikkerhet, regularitet (meir ekstremvær ) eller store elektriske tap med monstermaster er tatt med her.

NVE sin vurdering av sjøkabel byggjer på Statnett sine utredningar. Desse er ikkje kvalitetsikra av uhilda 3.part. Dei byggjer på overordna vurderingar og på gamal retorikk. Det vises til den same usikkerheten på forsyningskvalitet, vanskelighet og kostnad som i Hardanger for 12 år sidan. Halleland påstår at det er problematisk med sjøkabel». Har han gløymt at det er lagt tusenvis av kilometer med sjøkabel i norske fjordar og i havet til utlandet, og alle sjøkablane som Regjeringa planlegg for elektrifisering av sokkelen? NVE har ignorert mengder av høyringsinnspel frå folket, Etne kommune, Vestland fylkeskommune og andre interesse organisasjonar. NVE har heller ikkje brydd seg om at konsekvensutgreiinga av det biologiske mangfaldet er manglande, og på fjellet HEILT FRÅVERANDE.(ref. tilleggsnotat, KU 420kv Haugalandet.)

Regjeringa har uttala at i store utbyggingsaker SKAL den berørte kommune og innbyggjarar takast med og lyttast til. Denne saka er stor. Den får konsekvenser for naturen og artane som finns der i minst 80 år fram i tid. Det same gjeld for innbyggjarane og dei besøkande av fjella. Dette er grunnen til at me meinar Stortinget må synfare Etnefjellet, og slutthandsame denne viktige og omstridde saka. FSJT har aldri lagt seg opp i diskusjonen om denne krafta trengst. Me er opptatt av at krafta skal førast på ein måte som øydelegg minst natur. Dette i tråd med FNs naturavtale, som Norge slutta seg til i Montreal før jul. Me reknar jo med at den gjeld for Etnefjellet og.

Halleland snakkar om at eit tidsvindauge kan lukka seg om saka dreg ut i tid. Dette er eit pressmiddel og konsekvensen kan verta at naturens tidsvindauge blir lukka.

Halleland sine påstandar strider mot Etne FrP og Vestland FrP sine krav om sjø- og jordkabel på denne overføringa. Sigbjørn Framnes (FrP) var i Etne på markering 22.februar i fjor og framsnakka for Etne kommunestyre bruk av sjø- og jordkabel. FrP støtta og utgreiing av jord- og sjøkabelalternativet saman med fleirtalet i Vestland fylkesting i fjor.

Me er einige med Halleland i at mykje står på spel for regionen vår – NATUR, LIVSKVALITET OG TURISME. Halleland vil sjå på saksbehandlinga på generellt grunnlag, men ikkje for denne saka. Då er me einige om at ting må endrast. Me oppmodar Halleland til å vera med på ei endring NÅ. Det står ingen batterifabrikk klar å ventar på straum frå monstermastene. Beyonder har sjølv uttala at dei leitar etter kapital til å byggje, men først på Forus.

Beste helsing FSJT v/ Johan Strømsvold, Dag Jørgen Neraal, Grethe Tesdal.