Me seier at me aldri må gløyma. Men kva gjer me for å hugsa?

Me må aldri gløyma.»

Orda kjem igjen, kvart år. Dei står i avisspalter og på minnesider, dei blir sagt frå talarstolar og i nyheitssendingar. Me løfter dei fram med rettferdig tyngde – og me meiner dei.

Datoen 22. juli 2011 er ei djup rift i norsk historie. Det som skjedde denne dagen, skapte eit traume me som samfunn framleis lever med. 77 menneske blei drept. Dei fleste av dei unge, på sommarleir. Drapa var ikkje tilfeldige. Dei var målretta. Ideologisk motiverte. Eit angrep på demokratiet – og på deltakinga i det.