I Etne var det Aud Langhelle som fekk første dose av sjukepleiar Synnøve Lovra Viskjer. Nå har rundt 900 innbyggjarar fått første dose.
Arkivfoto: Grethe Hopland Ravn.
Ventar på fleire vaksinedosar
Etne og Vindafjord står klar til å fortsetja vaksineringa mot covid-19 som starta på sjukeheimane sist veke, men nå kan dårleg tilgang på vaksine forseinka arbeidet.
Dei første vaksinedosane frå Pfizer blei distribuert til Etne og Vindafjord sist veke. Etne fekk 15 dosar og Vindafjord 25, og denne veka har Etne kommune fått levert 24 dosar og Vindafjord 42 dosar. Med litt ekstra innsats er det mulig å pressa litt meir ut frå kvart glas som i utgangspunktet inneheld 5 dosar, men den store skilnaden blir det ikkje. Og for neste veke ser det heller dystert ut.
— Neste veke får me berre eitt glas, seier smittevernlege Elisabeth Winterthun i Etne kommune og ventar spent på kor mykje kommunen vil få dei komande vekene.
— Vaksineringa går etter planen, men det kjem få dosar. Det går tregt nå, så dette vil ta tid. Folk må vera tolmodige, seier ho.
