Vindafjordhallen
Valde det gamle namnet
Det kom inn heile 160 namneforslag til den nye symjehallen og bygdahuset i Vats. Valet fall på Vindafjordhallen, som var namnet på bygget som brann ned i 2019. No startar jakta på ein dagleg leiar av bygdahuset.
Dette melder Vindafjord kommune på si nettside.
— Namnet er godt innarbeidd, famnar heile kommunen og begge funksjonane i bygget, skriv kommunen på si nettside.
Annonse
Klart mest populært
Namnekomiteen som vurderte forslaga, bestod av tre medlemmer: rådgjevar for kultur og idrett i Vindafjord kommune, Norunn Helland, styreleiar i Vindafjordhallen SA, Janne Aursland, og kommunalsjef for samfunnsutvikling i Vindafjord kommune, Halfdan Krohn Brekke. Dei er takksame for det store engasjementet.
Det kom inn over 160 namneforslag. Forslaga er ifølgje kommunen gode og varierte. Komiteen har difor ikkje hatt ein enkel jobb, men eitt namn skil seg ut på to område: Det var klart flest forslag på dette namnet, og alle i komiteen hadde det som ein av sine favorittar blant forslaga.
Komiteen har i vurderinga vektlagt at namnet skal vere enkelt å forstå, representere heile Vindafjord og ikkje forfordele ein av funksjonane i bygget. Det er òg lagt vekt på at namnet skal vere godt eigna til marknadsføring av symjehallen, som er den mest utadretta delen av huset. Etter ei heilskapleg vurdering landa dei på Vindafjordhallen, som var namnet til hallen som stod der fram til brannen 22. juli 2019.
Annonse
Det blei gjennomført ei loddtrekning bland dei som har forslått Vindafjordhallen. Vinnar av eit årskort der Kirsten Sjurseike.
Søker etter sjef
Samtidig som namnet blir offentleggjort, blir stillinga som dagleg leiar i Vindafjordhallen SA, som skal drifte den nye bygdahusdelen, lyst ut. Stillinga er 100 prosent og har søknadsfrist 2. februar. Ifølgje annonsa er bygget planlagt innflyttingsklart 1. mai.
Vindafjordhallen SA blir driven av lag og foreiningar i bygda gjennom partslag. I annonsa skriv dei at bygdahuset vil vere ein viktig og samlande arena ved å skapa gode møteplassar og aktivitetar for alle aldersgrupper i Vats – så vel som i heile Vindafjord.
— Til vårt nye og moderne kulturhus søkjer me no ein driftig og sosial person, helst med erfaring frå både administrativ drift og drift av storkjøkken, skriv Vindafjordhallen SA.
Arbeidsoppgåvene til den daglege leiaren blir dagleg drift, inkludert økonomistyring og rapportering, drift av storkjøkken, inkludert kafédrift, selskapslokale og catering, praktisk førefallande arbeid og jamleg oppsyn med bygget, planlegging av aktivitetar og administrering av utleige, samarbeid med og vera kontaktperson for lag og foreiningar, vera nærmaste leiar for anna personale, og fungere som sekretær for styret.
