Storstova tar form

— Det verker som det kan bli eit kjempeløft for bygda og Vindafjord. Mange gler seg til det er ferdig, sa Nina Karin Ramsfjell (Sp) mens ho og resten av følgjet såg ned på symjehalldelen som begynner å ta form.

Driftsleiar Geir Egil Høvring GL Prosjektservice, som har byggejobben, gav politikarane i formannskapet ei engasjert omvising på byggeplassen til den nye symjehallen og bygdahuset i Vats tysdag.

Både norske og utanlandske arbeidarar er med å bygger eit nytt signalbygg mellom Vats skule, Hatteland stadion, bedehuset Arken og Vats kyrkje i Nedre Vats.

Vil nå fristen

Driftsleiar Høvring og Øyvind Thuen i GL Prosjektservice tok imot politikarane og prosjektleiar Frode Eike i kommunen, kommunedirektør Yngve Folven Bergesen og kommunalsjef Halfdan Krohn Brekke for samfunnsutvikling å innsida av porten til anleggsområdet.

— Prosjektet vil bli ein innertiar for kommunen, sa driftsleiaren.

Nærmast porten bli bygdahusdelen bygd. Høvring fortalde at dei nyleg begynte med stålmontasje der. Høgast, forutan ei tårnkrane, raga den første bassengveggen. Dagen etter besøket skulle den støypast. Etter å ha tatt for seg fleire punkter i framdriftsplanen opplyste Høvring at dei, mellom anna grunna litt meir utfordrande tilhøve i grunnen enn føresett, ligg litt bak skjema. Dei har fått utvida fristen for overlevering av bygget litt frå den originale på 30. april.

— Me jobbar likevel for å nå fristen, sa Høvring, og viste til blant anna feriearbeid som eit høve for å hente seg inn.

Å nå fristen ser driftsleiaren som både i selskapet og kommunen si interesse. Høvring nytta høve til å gi innspel til kva erfaringar politikarar og administrasjon bør ta med seg vidare til andre store prosjekt. Hans fremste råd var å gi meir tid til samspelsfasen. Denne prosessen omtala han som ein reduksjonsprosses, med referanse til at ein måtte kutte kostnadane med 20 millionar og prosjektet med 1.000 kvadratmeter.

GL Prosjektservice hadde også ansvaret for å bygge den nye ungdomsskulen på Frakkagjerd i Tysvær. Høvring fortalde at dei der hadde ein seks månadar lang samspelsfase, mens prosjektet i Vats hadde tre månadar, der av ein gjekk til ferie. Startfasen i Vats blei ifølgje driftsleiaren prega av endringar som følgje av grunnen, som ikkje var blitt undersøkt på fleire tiår før prosjektet. Totalt blei det 25 endringar som følgje av grunnen.

Nær budsjett

Med bygginga godt i gang omtalar Høvring samarbeidet med kommunen som godt. Etter den lengre introduksjonen tok han med seg følgjet bort til bassengdelen. Gjestane verka å like det dei såg. Nina Karin Ramsfjell (Sp) gleda seg over at prosjektet er såpass i rute og vatsbu Monica Nesheim (Sp) trakk fram poenget om at det kan vere klart til neste 17. mai. Den gamle Vindafjordhallen var senter for 17. mai-feiringa i Vats i 2019.

Ordførar og vatsbu Ole Johan Vierdal (Sp) har vore på byggeplassen tidlegare i prosessen. Han gler seg over at bygginga beveger seg framover og synest symjehallen og bygdahuset er eit kjempeflott prosjekt.

— Dette er etterlengta for bygda, seier Vierdal.

Tidlegare på dagen fekk politikarane ein statusgjennomgang av prosjektleiar Frode Eike i kommunen under formannskapsmøtet på rådhuset i Ølen. Der fortalte han at den varsla namnekonkurransen for storstova som blir reist der den gamle Vindafjordhallen brann ned 22. juli 2019 vil komme i haust.

Prognosen for totalprisen på bygget er cirka 209 millionar kroner, ein million over budsjettet. Dette skuldast at byggekostnad er estimert å bli ein million høgare enn budsjettert.

Mats Årvik (Frp) spurte Eike om ein er over den verste kneika kva gjeld fare for store kostnadsoverskridingar. Eike svara bekreftande på dette og viste til at ein nesten er ferdig med prosjektering.

— Det er veldig avgrensa risikofaktorar, sa Eike.