Spissa inn mot meir avansert teknologi

I verkstadhallen til Nonslid Bilservice AS i Skjold står bilar på rekkje og rad og ventar på å få seg ein sjekk. Enkelte av bilane er inne for den faste EU-kontrollen, medan andre treng litt meir arbeid før dei igjen er klare for landevegen. Radu Bogdan (22) er éin av fire tilsette som fyller arbeidsdagen med skruing og feilsøking, og sjølv om han har nokre månader igjen før han har fagbrevet i handa, manglar det ikkje på oppgåver han kan utføra.

— Eg lærer mykje nytt. Av og til er det vanskeleg. Det er litt ulikt frå bil til bil, seier Bogdan og kikkar ned i motorrommet på jakt etter moglege feil.

Ved hjelp av eigne diagnoseverktøy og eit årvakent blikk finn han raskt problemet.