Frå bygginga av Løkjelsvatn kraftstasjon.
ARKIVFOTO: TORSTEIN TYSVÆR NYMOEN
Samla årsresultat på 52 milliardar kroner for kraftnæringa
Årsresultatet for elektrisitetsnæringa var 52 prosent høgare i 2022 samanlikna med 2021. Straumprisane har aldri vore så høge som i andre halvdel av 2022.
Driftsinntektene for elektrisitetsnæringa samla auka med 66 prosent, medan driftskostnadene auka med 56 prosent, ifølgje SSB.
– Det har aldri vorte registrert høgare straumprisar enn i andre halvår 2022, seier seniorrådgivar Tom Jonas Billit i Statistisk sentralbyrå (SSB).
Prisen i engrosmarknaden var på 130,3 øre/kWh som gjennomsnitt for 2022. Det er ein auke på 102 prosent frå 2021, då snittprisen var på 64,5 øre/kWh.
Det var også store prisforskjellar i dei ulike regionane i landet. Prisane var høgast i Sør-Noreg. Til dømes var kraftprisen utan nettleige, avgifter og fråtrekk for straumstøtte for hushalda 211 øre/kWh i Vestfold og Telemark samanlikna med 39,4 øre/kWh i Nordland.
Straumstøtta som vart innført i desember 2021, hadde effekt i heile 2022 og bidrog til å dempe prisane for hushalda.
Driftsinntektene for elektrisitetsnæringa auka med 66,4 prosent frå 2021 til 2022, til 381 milliardar kroner. Driftskostnadene auka med 55,6 prosent til 253 milliardar kroner. Driftsresultatet vart 128 milliardar kroner, og auka med 92,5 prosent.
Utviklinga for næringa er uvanleg i historisk samanheng og er driven av dei auka marknadsprisane for elektrisk kraft i 2022.
– Prisaukane påverkar både inntektene og kostnadene, seier Billit.
