Opna showet for fullt hus
Dei unge skodespelarane imponerte publikum med vittige kommentarar, morosame ansiktsuttrykk og gøyale songar. Det var fullt hus då Sandeid barne- og ungdomsteater presenterte Folk og røvarar i Kardemommeby for spente familiar.
17 born og tre vaksne skodespelarar stod klar på scena på samfunnshuset i Sandeid då teppet gjekk opp, og det var klart for Kardemommeby. Dette er første gong Sandeid barne- og ungdomsteater set opp dette stykket.
– Det er mykje som skal klaffa fram mot premiera med lyd og lys, både framme på scena og bak. Men vi er kjempenøgde, fortel regissør Jostein Apeland etter premiera.
Det var nesten ingen ledige seter i salen, og ein kunne til ei kvar tid høyre både latterkrampar og storstilt applaus.
