Talet på smitta er det høgaste som er registrert her i landet sidan pandemien braut ut.
Førre rekord vart sett 1. november, då med 1.973 tilfelle, viser tala frå Folkehelseinstituttet.
Dei siste sju dagane er det i snitt registrert 1.467 koronasmitta per dag. Tilsvarande snitt for sju dagar sidan låg på 1.098, så trenden er stigande.
Kan komme tiltak
Helsedirektør Bjørn Guldvog gjekk tysdag ut og sa at det no er nødvendig å gå gjennom heile tiltakskjeda og sjå om det er nødvendig å justere på tiltaka.
Han varsla at det vil komme råd om nasjonale tiltak. Han nemnde stikkprøvekontrollar på grensa og tiltak rundt uvaksinert helsepersonell med pasientkontakt.
— Vi har gitt eit oppdrag til etatane våre om å fortløpande vurdere behovet for regionale og nasjonale tiltak. Dersom vi får tilrådingar om dette, vil vi raskt ta stilling til det, har helseminister Ingvild Kjerkol (Ap) tidlegare sagt til NTB.
Sjukehusinnleggingar
Tysdag var 187 koronapasientar innlagde på sjukehus. Det var elleve færre enn dagen før.
45 av pasientane ligg på intensivavdeling, og blant dei er 19 på respirator. Det er fire færre på intensiv og to færre på respirator samanlikna med dagen før, ifølgje Helsedirektoratets oversikt.
Ved midnatt natt til onsdag var det utført 8,1 million koronatestar her i landet sidan februar i fjor.
I alt har 220.513 personar testa positivt.
Til no har 4.213.336 personar fått første dose av koronavaksinen, og 3.758.932 personar har fått andre dose.
Dødsfall
Til saman er 924 koronasmitta personar døde i Noreg sidan mars 2020, viser førebelse tal. Om pasientane har døydd av eller med covid-19, er ikkje alltid mogleg å slå fast.
58,7 prosent av alle døde har fylt 80 år. I aldersgruppa under 50 år er det meldt om 22 dødsfall i Noreg.
